اردوغان و علییئو، شوشا بیاننامه‌سینی امضالادی
"طرفلردن هر هانسی بیرینین مستقیللیگینه و یا تورپاق بوتونلویونه اوچونجو بیر دؤولت طرفین‌دن تهدید و سالدیری حالین‌دا طرفلر بیر-بیرینه لازیم اولان یاردیمی ائد‌جک"
جمهورباشقانی رجب طیب اردوغان ایله آذربایجان جمهورباشقانی ایلهام علییئو، ایکی اؤلکه آراسین‌دا "شوشا بیاننامه‌سی"نی ایمضالادی.
جمهورباشقانی اردوغان، ۲۸ ایل سونرا ارمنستان ایشغالین‌دان قورتاریلان داغلیق قاراباغین سمبول شهری شوشادا علییئو طرفین‌دن رسمی مراسیمله قارشیلاندی.
شوشا والیلیگینده‌کی قارشیلاما مراسمینین آردین‌دان، علییئو و اردوغان، باش-باشا گؤروشمه‌یه گئچدی.
گؤروشمه‌نین آردین‌دان اردوغان و علییئو، ایکی اؤلکه آراسین‌دا "شوشا بیاننامه‌سی"نی ایمضالادی.
جمهورباشقانی اردوغان، تشکیل ائدیله‌ن اورتاق مطبوعات کنفرانسین‌دا، "شوشا بیاننامه‌سی" ایله ایکی اؤلکه ایلیشکیلرینین یئنی دؤورده‌کی یول خریطه‌سینی تعیین ائتدیکلرینی سؤیله‌دی.
۴۴ گونلوک بیر ساواشین آردین‌دان قاراباغین، صاحبلرینین الینه گئچدیگینی و ارمنی ایشغالین‌دان قورتولدوغونو ایفاده ائد‌ن اردوغان،
" آذربایجان خالقینین قاراباغ ظفرینی بیر دفعه داها تبریک ائدیره‌م" دئدی.
اردوغان، تورکیه اولاراق مستقیل‌لیک مبارزه‌سین‌ده اولدوغو کیمی یئنی‌دن قورما فعالیتلرین‌ده ده آذربایجانا هر جور قاتقینی وئرمه‌یه داوام ائد‌جکلرینی بیلدیردی.
اردوغان، قاراباغین تکرار اسکی احتیشامینا و اؤز کیملیگینه قوووشاجاغینی ایفاده ائد‌رک، بیر طرف‌دن ییخیملاری تلافی ائدرکه‌ن دیگر طرف‌دن ده قاراباغ و آذربایجان تورپاقلارینین بیر داها بئله بیر فاجعه یاشاماماسی اوچون لازیم اولان تدبیرلری آلاجاقلارینی سؤیله‌دی.
هر کسی آذربایجانین ظفرینی قبول ائتمه‌یه دعوت ائد‌ن جمهورباشقانی اردوغان،
" ارمنستانین اؤزونه اوزادیلان یاخشی نیت و دایانیشما الینی توتما فرصتینی یاخشی قوللانما‌سینی آرزو ائدیریک. ۶لی پلتفورملا (روسیا، تورکیه، آذربایجان، ارمنستان، گورجوستان و ایران) بیرلیک‌ده آرتیق بؤلگه باریش ایچین‌ده یاشانان بیر بؤلگه اولسون ایسته‌ییریک. بیز قارداشیملا (علییئوله) بیرلیک‌ده هر جور فداکارلیغا واریق" دئیه دانیشدی.
یوکسک سویه‌لی استراتژیک امکداش‌لیق ییغینجاغینی اؤنوموزده‌کی آیلاردا تورکیه‌ده ائد‌جکلرینی بیلدیره‌ن اردوغان، ۱ آوریل‌ده باشلاتدیقلاری کیملیکله سیاحتین، قارشی‌لیق‌لی ایلیشکیلری آسانلاشدیراراق ایکی اؤلکه‌نی بیر بیرینه داها دا یاخینلاشدیراجاغینی قید ائتدی.
اردوغان، تورکیه اولاراق قدیم شهر شوشادا ان قیسا مدت‌ده بیر باش کونسوللوق آچماغی پلانلادیقلارینی دا بیلدیردی.
آذربایجان جمهورباشقانی علییئو ده، شوشا بیاننامه‌سینین، ایکی اؤلکه آراسین‌دا گله‌جک امکداشلیغین ضمانتی اولدوغونو سؤیله‌دی.
قاراباغ ساواشینا باشلانان گوندن بو گونه جمهورباشقانی اردوغانین، آذربایجانا آچیق و آیدین دستک اعلان ائتدیگینی خاطیرلادان علییئو،
"بیز ساواشدا تورک خالقینین دایانیشماسینی گؤردوک. تورکیه‌نین وئردیگی دستگی هئچ بیر زامان اونوتمایاجاغیق" دئدی.
علییئو، تورکیه ایله آذربایجان آراسین‌دا ایمضالانان "متفق‌لیک آنلاشما‌سی"ندا ۱۰۰ ایل اؤنجه ایمضالانان قارس آلاشماسینا عطف ائدیلدیگینی بیلدیردی.
شوشا بیاننامه‌سین‌ده یئر آلان ماده‌لر بئله:
"طرفلر، تورکیه-آذربایجان ایلیشکیلرینین داها دا گئنیشلدیلمه‌سی و درینلشدیریلمه‌سی پرسپکتیولرینی هر یؤنو ایله اینجه‌له‌یرک بیان ائدر.
آذربایجان، ارمنستانین ۳۰ ایل داوام ائد‌ن سالدیریسینا سون وئریلمه‌سی، ایشغال ائدیلمیش تورپاقلارین قورتاریلماسین‌دا تورکیه‌نین دستگینه یوکسک دگر وئرمک‌ده‌دیر.
طرفلر، ایشغال‌دان قورتاریلان تورپاقلاردا تورکیه-روسیا اورتاق مرکزینین فعالیتلرینه تورکیه‌نین قاتقی‌سینین اؤنملی رول اوینادیغینا وورغو ائدر.
طرفلر، بؤلگه‌سل و کوره‌سل گوونلیک و ثابت‌لیک مسئله‌لرینین تحلیل ائدیلمه‌سی یؤنونده اورتاق چابا گؤستریر.
طرفلردن هر هانسی بیرینین مستقیللیگینه و یا تورپاق بوتونلویونه اوچونجو بیر دؤولت طرفین‌دن تهدید و سالدیری حالین‌دا طرفلر بیر-بیرینه لازیم اولان یاردیمی ائد‌جک".
بیاننامه‌ده، تورکیه و آذربایجانی بیرلشدیره‌ن زنگه‌زور کوریدورونون آچیلماسی و نخچیوان-قارس دمیر یولونون، ایلیشکیلرین سیخلاشدیریلماسینا قاتقی وئره‌جگی ایفاده ائدیلدی.
ایلگیلی‌لی خبرلر
قیرقیزیستاندا مافیا ماللاری ساتیشا چیخاریلدی
ساتیلان املاک، متشکیل سوچلار و فسادلا موباریزه چرچیوه‌سینده دؤولتین مولکیتینه گئچمیشدی
