ابدی مشعللر کیمی یانان گۆل - ابراهیم ساوالان
بیر چوخ سؤزو بیزدن آپاردیقلاری کیمی فارسلار بو گولون آدینی دا بیزدن آپاریب آما یئنه ده سؤزو ترسه باشا دوشوبلر
بوگونلر طبیعتین هر بوجاغیندا اولمپیک مشعلی کیمی، میثرا مشعلی کیمی، بلکه ده کوراوغلونون میثری قلینجی کیمی یانان بیر سیغیرقویروغو گؤرونور و من اونلارا باخماقدان دویمورام.
یاشلی اؤکوزون باشقا آدی سیغیردیر. اونا گؤره، یارپاقلارینی یئره سریب اندامینی گؤیه قالدیران بو ساری گوللو بیتگینی اؤکوز قویروغونا بنزهدیب "سیغیرقویروغو" آدلاندیرمیشیق.
بو گولون دیلیمیزده باشقا آدلاری دا واردیر. تیکانتپهده قادما، مرند کندلرینده گوگئیین و گوگئییم و زنگاندا جالبا آدلاریلا تانینان بو بیتگینین دادی تورش اولور و اونو یئین آدامین دیل دوداغینی کئییدیر.
قدیم زامانلار سیغیرقویروغونو ازیب سویا تؤکردیلر. بالیقلار بیحیس اولوب سویون اوزونه گلردی و آداملار راحاتجاسینا اونلاری توپلاردی. حئیوانلارین دریسیندن دوزلمیش تولوغون قوخوسو چکیلسین دئیه سیغیرقویروغونو سودا قاینادیب درینی اونون سویو ایله یویاردیلار و تولوغون قوخوسو همهشهلیک گئدردی. سیغیرقویروغونون درمانی خصیصهلری ده وار؛ گیزیلتینی توختادیب آغرینی کسیر یارانی دا کئییدیر.
آما سیغیرقویروغو ناغیللار و افسانهلرین ده بَزَییدیر. اطرافیندا بیتن بوتون بیتگیلردن هوندور اولدوغونا گؤره، باشقا بیتگیلر اوزاقلاردا اولوب- کئچنلری اوندان سورورلار و او بیتگیلری هرنهدن خبردار ائدر. او یولچولارا دا یول گؤسترر. اسلی- کرم ناغیلینین بیر روایتینده اسلی لئچهیینی سیغیرقویروغو باشینا باغلاییرکی کرم اونون واسیطهسیله اونو تاپابیلسین و اسلینی آختاران کرم، یولو سیغیرقویروغو کولوندان سوروشور:
سیزه قوربان اولوم آ سیغیرقویروغو کوللاری
اؤرتوبسوز باشیزا ساری-ساری شاللاری
گؤسترین منه اسلیم گئدن یوللاری
گئدیب او یوللارا جان قوربان ائدیم.
بو شئعر اسلی- کرمین زنجان روایتینده بئلهدیر:
باشینا دؤندویوم جالبا کوللاری
سارییب باشینا ساری شاللاری
گؤسترین منه اسلیم گئدن یوللاری.
بیر چوخ سؤزلری بیزدن آپاردیقلاری کیمی فارسلار بو گولون آدینی دا بیزدن آپاریب آما یئنه ده سؤزو ترسه باشا دوشوبلر. تورکجهده سیغیر لوغتی ایله یاخین سسلهشن سوغور لوغتی ده واردیر. سوغور بیر تور دووشان آدیدیر و کئچمیشده تیکانتپه شرقینده یئرلشن بالقیز داغی اتکلرینه ده سوغورلوق دئمیشلر. فارسلار سیغیرقویروغونو، سوغورقویروغو دوشونرک بو گوله خرگوشک دئییب هئچ ده دوشونمهمیشلرکی بیر مئتردن اوجا دووشان قویروغو اولارمی؟ ابدی مشعللر کیمی یانان بو گوله خرگوشک آدی وئرمک دوغرومو؟
ایلگیلیلی خبرلر
آذربایجان باشباخانی تورکیهده
آذربایجان باشباخانی، جمهورباشقانی رجب طیب اردوغان طرفیندن ده قبول ائدیلهجک