قوی خلقیمیز غرور دویسون-ابراهیم ساوالان

تهران سفریندن تزه‌جه قاییتمیشدی. اوگونلر هر نه‌دن آرتیق خالقا معنوی آزادلیق حیسسی و قالارغی اؤزگووَن وئرمه‌یی دوشونوردو میرجعفر پیشه‌وری. بلکه ده تهراندا گئدن مذاکیره‌لردن بیر شئی‌لر سزمیشدی. بلکه ده او گونلر دوشونجه یاراتماغی دؤولت قوروماقدان داها جیددی‌یه آلمیشدی. هر نه‌یدیسه تزه بیر تکلیف وئردی: گولستان باغینداکی رضاشاه هئیکلی یئندیریلیب یئرینه ستارخان هئیکلی قویولسون.

بو تکلیف ایکینجی آیین 27سینده ایجرا اولدو و پیشه‌وری گولوستان باغینا توپلانمیش اینسانلار بئله دئدی:

بیر لحظه مکتبده راحاتجاسینا دانیشیب اویناقلایان اوشاقلاری دوشونون. ایندی فرض ائدین او لحظه، مکتب ناظیمی پنجره‌دن ایچری باخسین. اؤزونو راحات و آزاد حیسس ائدن اوشاقلار سوسوب قیسیلاجاقلار.

نه‌ قدر شهرلریمیزین میدانلاریندا و باشیمیزین اوستونده مرتجعلرین هئیکللری بیر ناظیر کیمی، بیر ناظیم کیمی دایانیبسا، خلقیمیز ایچینده راحاتلیق و معنوی آزادلیق حیس ائتمه‌یه‌جکدیر. محض بونا گؤره، بیز بوگون رضاخان هئیکلینی یئندیریب ستارخان هئیکلینی برپا ائتمکله، ایللر بویو باشیمیزا کؤلکه سالان قارا تبلیغاتین اوستونه قیرمیزی خط چکیریک. قوی خلقیمیز، هر ساعات باشی اوستونده کی ناظیملر یئرینه، قهرمانلارینی گؤروب ایجینده غرور دویسون.