فارسجا، رسمی دؤولت و مجبوری تحصیل دیلی‌دیر! - حسن راشدی
"کاذب ایکی‌لیگه، اؤدول وئردیگینیز جواد طباطبایی کیمی اینسانلار سبب اولور"
جمهورباشقانی حسن روحانی، شنبه گونو، ۱۱ اردیبهشت، "معلملر گونو" عرفه‌سین‌ده، اؤلکه‌ده‌کی بیر قروپ اؤیرتمنله گؤروشمه‌سینده بونلاری سؤیله‌دی:
"تأسف کی، بو گون بعضی پیس نیت‌لی شخصلر میللی کیملیگی، فارس دیلینی و اونون مرجعیتینی هدف آلیر و آنا دیلی ایله رسمی و میللی دیل اولاراق یالانجی بیر ایکی‌لیک یاراتماغا چالیشیر و عزیز اؤیرتمنلر بو توطئه‌نی خنثی ائده‌بیله‌جک و ائتمه‌لی اولان تک کسمدیر».
سایین روحانی!
۱۳۹۲ده جمهورباشقانلیغی نامیزدی اولدوغونوزدا، تبلیغاتینیزین ان پارلاق قونولاریندان بیری آنایاسانین ۱۵.جی ماده‌سینی تطبیق ائتمک و سئچیلدیگینیز تقدیرده اوخوللاردا فارس اولمایانلارا آنا دیللرین‌ده تحصیل آلما ایمکانی تامین ائتمک ایدی؛ ایندی، سککیز ایل گئچدیکدن سونرا و جنابینیزین جمهورباشقانلیغی دؤرونون سونا چاتماسی ایله، "ساختا بیر ایکی‌لیک"دن بحث ائدیرسینیز؛ ایراندا، اؤز آنادیللریندا حتی ایلک اوخول سویه‌سینده بئله تحصیل آلما امکانیندان محروم و بوندان شکایتچی اولان و جمعیتلری فارسجا دانیشانلاردان داها چوخ اولان فارس اولمایانلارین وارلیغی، کی یالنیز تورکلرین ساییسی بو جمعیتین یوزده 40ینی اولوشدورور، "کاذب ایکی‌لیک یاراتماق" می اولور؟
دیل‌داشینیز اولان دوغو قونشونوز افغانیستان‌دا پشتو و دری دیللری اؤلکه‌نین رسمی دیللردیر و دیگر دیللر ده او دیللری دانیشانلارین چوخونلوق اولدوقلاری بؤلگه‌لرده رسمی دیلین یانیندا اؤیره‌دیلیر. سیزین، سککیز ایل بویونجا جمهورباشقانی و یئریتمه ارکینین باشقانی اولدوغونوز، مدرن و گلیشمیش اولدوغونو ادعا ائتدیگینیز ایراندا وضعیت نئجه‌دیر؟
اؤلکه‌ده، دیلی فارسجا اولمایانلارین رسمی دیلین یانیندا اؤز دیللرین‌ده تحصیل آلما حاقی اولماسی لازیم دئییل می؟
اسلام انقیلابین‌دان قیرخ ایکی ایلده‌ن چوخ بیر مدت سونرا، ایراندا فارس اولمایانلارین بو اینسانی، طبیعی و ایلکین حاقینی یئرینه یئتیرمک اوچون هانسی آددیملار آتیلدی و سیز بو قونودا هانسی مثبت ایشلری گؤردونوز؟!
ایندی ایسه توپلومون بو کسیمینین سسی آیریمچیلیقدان دولایی یوکسلدیگینه گؤره، سیز بونا "کاذب ایکی‌لیک" می دئییرسینیز؟
کاذب ایکی‌لیگه، اؤدول وئردیگینیز جواد طباطبایی کیمی اینسانلار سبب اولور و ایندی بو شخص که "ایرانشهری" تئوریسی ایله فارسجا دیشینداکی دیللری و بو دیللرده تحصیل حاقینی انکار ائدیر و توپلومداکی ممنونیت‌سیزلیگی آرتیریر، آمریکادا جو بایدنین مشاوری اولان قیزینین یانیندا دینجلمکده‌دیر.
حسن راشدی: بازار گونو، ۱۲ اردیبهشت ۱۴۰۰
