یاغیش دا کیملیگینه قوووشدو
یاغیشین آتاسی: اوشاقلاریمین هر بیرینین آدی اوچون دیشیمله، دیرناغیملا ساواشمیشام
ایران ثبت احوال اداره‌سی، ۴ آی سونرا، آذربایجان‌لی اوشاغا یاغیش آدینین قویولماسینا اونای وئردی.
باتی آذربایجانین شاهیندژ (سایین قالا) شهرینده بیرکؤرپه‌یه، تورکجه اولدوغو اوچون یاغیش آدی قویولماسی ایله مخالفت ائدیلمیشدی. اوشاغین آتاسی، ثبت احوال اداره‌سی مامورلارینین باشقا آد سئچمه اصرارینا باخمایاراق، سئچدیکلری آددان وازگئچمه‌دی و نتیجه آلدی.
یاغیشین آتاسی بابک قابل‌نژاد اینستاگرام حسابیندان،
"میللتین ایستک و ایراده‌سی سارسیلمازدیر. نژادپرست دئوین بوینوزو سیندی. آیلارجا چابادان سونرا یاغیش خانیم سونوندا کیملیک صاحبی اولدو. بؤیوک میللتیمیزین کیچیک قیزینا کؤمک ائتمیش اولان هر کسه تشکر ائدیرم. اوشاقلاریمین هر بیرینین آدی اوچون دیشیمله، دیرناغیملا ساواشمیشام.
ائلشن
سون‌ار
یاغیش
حاق سئل کیمی دریایه آخیب یول تاپاجاقدیر
داش آتماق ایله کیمسه اونو دؤندو‌ره‌بیلمز
دونیادا قارانلیقلار اگر بیرلشه باهم
بیر خیرداجا شمعین ایشیغین سؤندوره‌بیلمز" مئساژی ایله یاغیشین کیملیگینه قوووشدوغو خبرینی پایلاشدی.
بیرلشمیش میلتلر اوشاق حاقلاری سؤزلشمه‌سی‌نین ۷.جی بندینه گؤره،
"اوشاغین دوغومو، دوغومدان همن سونرا ثبت ائدیلیر و هر اوشاق بیر آدینین اولماسی، تابعیت و والدین حمایه‌سی کیمی حاقلارا صاحبدیر".
