ایران تلویزیونوندا تورک شاعیر فضولییه سایغیسیزلیق
ایکی تورک شاعیرین باغلانتیسیز شخصلرجه یاریشدیریلماسینا اعتراض ائدن تورک اینترنت استفادهچیلرینین بیر چوخو، بو خطانین بیلگیسیزلیک ایله بیرلیکده غرض ایچردیگینی دوشونور
ایران تلویزیونوندان یایینلانان درس سیراسیندا، تورک شاعیر محمد فضولی، آشاغیلاییجی بیر دیل ایله توصیف ائدیلدی.
ایران رادیو و تلویزیون قورومونا عاید بیر کانالدا ادبیات اوزمانی اولاراق فارس دیلینده درس آنلادان بیر اؤیرتمن، آذربایجان و تورک دونیاسینین بؤیوک شاعیری محمد فضولی حاقیندا آشاغیلاییجی بیر دیل ایله گرهکسیز و یانلیش بیلگیلر پایلاشدی.
فارس دیلی و ادبیاتی دکترو اولدوغو بیلدیریلن بو اؤیرتمن، تورک شاعیر تبریزلی صائب دوغولمادان ۳۶ ایل اؤنجه وفات ائتمیش اولان فضولینی، صائبین آردیلی اولاراق حساب ائدیر و فضولی تخلصونه دیل اوزاداراق، شاعیرین بو تخلصو، صائبین شعرلرینین فضولو اولدوغو اوچون سئچدیگینی دیله گتیریر. اؤیرتمنه گؤره، فضولی، داها دونیایا گلمهمیش تبریزلی شاعیر صائبین فارسجا شعرلرینی تورکجهیه چئویریرمیش. "فضولی" کلمهسی عربجهده "دیل اوزاتما، بیرینی ایلگیلندیرمهین ایشلره مداخله ائتمه" آنلامینا گلمکدهدیر. شاعیر، بو تخلصو ندن سئچدیگینی ده دیوانینین اؤنسؤزونده اینجه بیر شکیلده آچیقلاماقدادیر.
بو یانلیش یاناشمایا و ایکی تورک شاعیرین باغلانتیسیز شخصلرجه یاریشدیریلماسینا اعتراض ائدن تورک اینترنت استفادهچیلرینین بیر چوخو، بو خطانین بیلگیسیزلیک ایله بیرلیکده غرض ایچردیگینی دوشونور.
تورک دونیاسینین ان بؤیوک شاعیرلریندن اولان فضولی، هجری ۱۴۹۴ تاریخینده کربلادان آنادان اولموش، ۱۵۵۶ تاریخینده ایسه وفات ائتمیشدیر. ۱۵۹۲.جی ایلده آنادان اولان تورک شاعیر تبریزلی صائبین، تورک شعرینین ذیروهلریندن امیر علیشیر نوایی و فضولیدن ایلهام آلدیغی بیلینیر.
فضولی دئییر:
کؤنلوم آچیلیر زلف پریشانینی گؤرجک
نطقیم توتولور غنچۀ خندانینی گؤرجک
باخدیقجا سنه قان ساچیلیر دیدهلریمدن
باغریم دهلینیر ناوک مژگانینی گؤرجک
رعنالیق ایله قامت شمشادی ائدن یاد
اولماز می خجل سرو خرامانینی گؤرجک؟
چوخ عشقه هوس ائدنی گؤردوم کی، هواسین
ترک ائتدی، سنین عاشق نالانینی گؤرجک
کافر کی، دئییل معترف نار جهنم
ایمانه گلر آتش هجرانینی گؤرجک
نازیکلیک ایله غنچۀ خندانی ائدن یاد
ائتمز می حیا لعل دور افشانینی گؤرجک؟
سن حال دلین سؤیلمهسن، نولا، فضولی
ائل فهم قیلیر ناله و افعانینی گؤرجک
صائب دئییر:
الدن چیخارام زلف پریشانینی گؤرجک
ایشدن گئدرم سرو خرامانینی گؤرجک
سوسوزلارا گر جان آخیدیر چشمه حیوان
من جان ویریرم چشمهی حیوانینی گؤرجک
گر باغلاماسا ائل گوزنو شرم عذارین
جاندان کسیلیر خنجر مژگانینی گؤرجک
ریحان که نزاکت توکولوردی قلمیندن
خط تیره چکر زلف پریشانینی گؤرجک
بلبل که گولون لعل لبیندن سوز آلیردی
دیلی دولاشیر غنچه خندانینی گؤرجک
رضوان که بهشتین یئمیشی گؤزینه گلمز
دیشلر الینی، سیب زنخدانینی گؤرجک
تردن خط ریحان ورقین پاک سیلیپدیر
نقاش گلستان خط ریحانینی گؤرجک
گولرنگ اولور صبح اتگی قانلو تریندن
خورشید عذار عرق افشانینی گؤرجک
مژگانی اولوب قانلو یاشیندان رگ یاقوت
صائب لب لعل گهر افشانینی گؤرجک
ایلگیلیلی خبرلر
قیرقیزیستاندا مافیا ماللاری ساتیشا چیخاریلدی
ساتیلان املاک، متشکیل سوچلار و فسادلا موباریزه چرچیوهسینده دؤولتین مولکیتینه گئچمیشدی