معجزون شعرلرینده قارداش و داداش قاوراملاری - ابراهیم ساوالان

میرزه‌علی‌معجزون شعرلرینده ایلگینج بیر لوغت آنلاییشینا توش‌گلدیم. او شعرلرده بیر آنادان اولان آداملار بیربیرینی قارداش و بیر آتادان اولان آداملار بیربیرینی داداش سسله‌ییر و بو آنلاییش چوخ دا دوغرو نظره گلیر منجه.

بو ایکی لوغتده گؤرونن «داش» پسوندی یولداش (هم‍ـراه)، چاغداش (همـزمان)، سیرداش (همـراز)، دیلداش (همـزبان)، یوردداش (همـوطن) لوغتلرینده اولدوغو کیمی، فارسجا «هم» آنلامی وئریر و قارداش اصلینده قارینداش اولاراق، جنسیّت فرقی اولمادان بیر قاریندان دوغولموش آداملارا، داداش یا دده‌ش فرقلی آنا و بیر دده‌دن اولان آداملارا و بیر آتا- آنادان اولانلارا، آنا باغلانتی‌سینی اوستون توتاراق ائله همن قارداش لوغتی‌نی ایشله‌نیرمیش.

بونلاردان علاوه او شعرلرده باشقا بیر آنلاییش دا واردیر؛ اینسانلار گئنل و عمومی محیطلرده بیربیرینی چوخلو داداش و اؤزل، خصوصی، صمیمی و داها یاخین محیطلرده چوخلو قارداش سسله‌ییرلر، یانی گئنل اورتاملاردا آداملار آتا واسیطه‌سیله و یاخین محیطلرده آنا واسیطه‌سیله تانینیرمیشلار.