سالار طاهرافشار گؤزآلتینا آلیندی

آذربایجانلی آکتیویست سالار طاهر افشار، اورمیه‌ده گؤزآلتینا آلیندی.

تورک آکتیویستین ندن گؤزآلتینا آلیندیغی و هارا آپاریلدیغی ایله باغلی بیر بیلگی اولماسا دا، داها اؤنجه محکوم ائدیلن بیر ایللیک حبس جزاسینی چکمک اوزره آپاریلدیغی تخمین ائدیلیر.

طاهر افشار  داها اؤنجه اورمیه انقلاب محکمه‌سی طرفیندن 4 ایل حبسه محکوم ائدیلمیشدی. 
گئچن تیر آییندا اورمیه‌ده تشکیل اولان اعتراضلار سیراسیندا گؤزآلتینا آلینان طاهر افشار، 5 گون سونرا موقتی اولاراق سربست بوراخیلمیشدی.
تورک آکتیویست، تجدید نظر محکمه‌سینده یاسادیشی میتینگ تشکیل ائتمه‌ گیریشیمیندن تبرئه ائدیلدی، نظاما قارشی تبلیغ سوچوندان ایسه بیر ایل حبس جزاسینا محکوم ائدیلدی.
طاهر افشارین داها اؤنجه ده دینج فعالیتلری سببی ایله گؤز آلتینا آلیندیغی و توتوقلاندیغی بیلدیریلیر.