علییئو، لوکاشنکو ایله گؤروشدو
"آذربایجان میللی خیالینی گرچکلشدرمه یولون‌دا بؤیوک بیر آددیم آتدی آنجاق بو یالنیز ایلک آددیم‌دیر"
بلاروس جمهورباشقانی آلکساندر لوکاشنکو، رسمی دانیشیقلار اوچون گئتدیگی آذربایجان‌دا، جمهورباشقانی ایلهام علییئو ایله گؤروشدو
آذربایجان جمهورباشقانلیغیندان وئریله‌ن آچیقلامایا گؤره، ایلهام علییئو، لوکاشنکو ایله گؤروشمه‌سین‌ده، گئچه‌ن ایل یئنی تسیل کوروناویروس (کووید-۱۹) سالقینینا باخمایاراق بلاروسا صادراتین آرتدیغینی سؤیله‌دی.
علییئو، ارمنیستان ایشغالین‌دان قورتاریلان قاراباغین آبادلیغی قونوسونا دا توخوناراق،
"بلاروس شیرکتلرینین اؤلکه‌نیزده اکین‌چی‌لیک صنایعی کمپلکسلری اولوشدورما تجروبه‌سینی بیلیریک. بو سبب‌دن قورتاریلمیش تورپاقلارین آبادلیغی باخیمین‌دان بو مسئله، گؤروشمه‌میزده اؤزل بیر یئر توتماق‌دادیر" دئدی.
آذربایجان ایله بلاروس ایلیشکی‌لرین‌ده هر هانسی بیر پروبلئم اولمادیغینی وورغولایان علییئو، منتظم تماسلارین ائدیله‌ن ایشلری دانیشماغا، سونراکی آددیملارینی اؤلچمه‌یه و ایکی دوست اؤلکه اولاراق ایر‌لیله‌مه‌لرینه ایمکان تانیدیغینی سؤیله‌دی.
بلاروس جمهورباشقانی لوکاشنکو دا، ایکی اؤلکه‌نین سیاست و اقتصاد ساحه‌سین‌ده چوخ چئشیدلی و چوخ دوغرو ایلیشکی‌لری اولدوغونو ایفاده ائدرک،
"بو ایلیشکی‌لره کیمسه ضرر وئره بیلمیر. بیز کیمسه‌یه مانع دئییلیک و کیمسه بیزه مانع اولا بیلمز" دئدی.
لوکاشنکو، قاراباغ ظفرینه عطف ائدرک بونلاری سؤیله‌دی:
"آذربایجان میللی خیالینی گرچکلشدرمه یولون‌دا بؤیوک بیر آددیم آتدی آنجاق بو یالنیز ایلک آددیم‌دیر. قورتاریلمیش تورپاقلاردا حیاتی یئنی‌دن قورماق اوچون چوخ چابا صرف ائدیلمه‌سی لازیم‌دیر. بلاروس‌دا گوونیلیر دوستلارینیزین اولدوغونو بیلیرسینیز. ایمکانلاریمیزی بیلیرسینیز".
گؤروشمه سونراسین‌دا ایکی اؤلکه آراسین‌دا اکین‌چی‌لیک، توریزم و انرژی ساحه‌لرین‌ده امکداش‌لیق آنلاشمالاری ایمضالاندی.
