مهاباد جمعه امامی: قویون اورمیه گؤلو قوروسون!

اورتادوغو و آذربایجان بؤلگه‌سینین ان بؤیوک دوزلو گؤلو، اورمیه گؤلونون قورتاریلماسی اوچون باشلادیلان پروژه‌نین یئددینجی ایلینده دقت چکیجی بیر آچیقلاما گلدی.
اورمیه گؤلونو قورتارما مرکزی پلانلاما افیسی مودورو مسعود تجریشی، خبر آنلاین سایتینا وئردیگی مصاحبه‌ده، اورمیه گؤلونون دورومو ایله باغلی جدی قایغیلارین اولدوغو و بو قایغیلارین داوام ائتدیگینی بیلدیررک،
"اورمیه گؤلونون دورمو چوخ دییشکن و غیر ثابتدیر، ان کیچیک بیر ائتکی ایله وضعیت دییشه‌بیلیر" دئدی.
تجریشی آیریجا ایران مجلیسینین بعضی میللت وکیللری طرفیندن سسلندیریلن "اورمیه گؤلو اطرافیندا سو آنباری تیکیمی پروژه‌لرینی باشلاتما" فیکرینه و بو قونودا باسقیلارین اولدوغونا دا توخوناراق، بو گیریشیملرین گؤلون دورومونون داها دا پیسلشه‌جگی قایغیلارینی آلوولاندیردیغینی دیله گتیردی.

مسعود تجریشی سؤزلرینین ان چارپیجی بؤلومونده، ایرانلی بعضی مسئوللارین اورمیه گؤلونو قورتارما پروژه‌لرینه قارشی چیخدیغینا اشاره ائتدی. بونونلا باغلی تجریشی، 
"مهاباد (سویوق بولاق) جمعه امامی منه، 'باشقا گؤل قورومادی می، بوراخین بو دا قوروسون' دئدی" ایفاده‌لرینی ایشلتدی. (باتی آذربایجان شهرلریندن بیری اولان مهاباد، اورمیه گؤلونون گونئیینده یئر آلماقدادیر).
تجریشی‌نین خاطیرلاتدیغی بو ایفاده، سوسیال مئدیادا آذربایجان‌لی تورکلر طرفیندن تپکی ایله قارشیلاندی.
اورمیه گؤلونو قورتارما مرکزی یئتکیلیلری، گؤلون دورومونون بیر آز یاخشیلاشماسینا سبب اولاراق گؤرولن ایشلری و پلانلامالاری گؤسترسه ده، قارشی قروپ، بو یاخشیلاشمانی یالنیزجا آشیری یاغیشلارا باغلاماقدادیر.
گؤلون گونئی طرفینده، ۱۰۰ مین هکتارلیق بیر بؤلومون آرتیق تاماماً قورودوغو و گؤل حؤوضه‌سیندن آیریلدیغی بیلدیریلیر.