آییل: ۹ آیلیق بیر مباریزه‌نین آدی
"تخمیناً اوچ هفته اؤنجه نفوس مودورلوگونه گئتدیم و مسئوللارا 'اگر آییل بالامین کیملیگینی وئرمه‌سه‌نیز عائله‌مله اداره بیناسینین قاپی‌سینین قارشی‌سین‌دا اوتورما ائیلمی باشلاداجاغام' دئدیم"
اردبیل شهرین‌ده یاشایان آذربایجان تورکو موسیقیچی سجاد جولانی‌نین، یئنی دوغان قیزینا تورکجه آد وئرمه موباریزه‌سی ۹ آی سونرا نتیجه‌یه چاتدی.
آنادولو آژانسینا دانیشان آذربایجان تورکو موسیقیچی سجاد جولانی، اردبیل شهرین‌ده‌کی نفوس مودورلوگوندن یئنی دوغان قیزی اوچون ۹ آی سونرا "اویانماق" و "آیاغا قالماق" معناسینی وئره‌ن تورکجه "آییل" یازی‌لی کیملیگی آلماغی باجاردیغینی سؤیله‌دی.
عائله، قیزلارینا تورکجه آد وئره بیلمک اوچون آیلاردیر موباریزه ائدیردی.
جولانی، "تخمیناً اوچ هفته اؤنجه نفوس مودورلوگونه گئتدیم و مسئوللارا 'اگر آییل بالامین کیملیگینی وئرمه‌سه‌نیز عائله‌مله اداره بیناسینین قاپی‌سینین قارشی‌سین‌دا اوتورما ائیلمی باشلاداجاغام' دئدیم. منه سؤزلوکده آییلین معناسینی تاپیب گتیرمه‌می سؤیله‌دیلر، آپاردیم. یئنه بیر نتیجه چیخمادی. اونلارا اوتورما ائیلمین‌ده قرارلی اولدوغومو سؤیله‌دیم. سونوندا ۹ آی سونرا بالامین کیملیگینی وئرمه‌یی قبول ائتدیلر" دئدی.
بو مدت‌ده اؤزونه دستک اولان هر کسه تشکرلرینی بیلدیرن جولانی، ایران‌دا اوشاقلارینا تورکجه آد وئرمک ایسته‌یه‌ن عائله‌لرین پروبلئمینین تئزلیکله حل اولماسینی اومود ائتدیگینی ایفاده ائتدی.
جولانی، بونلاری قئید ائتدی:
"ایران‌دا یاشایان تورکلر، اوشاقلارینا تورکجه آد قویما قونوسون‌دا پروبلئملر یاشاییر. بو دورومدا اولان بیر چوخ عائله وار اما باسقیلار سببیله بو قونونو مئدیایا داشیماق‌دان چکینیرلر. بعضی اوشاقلارین آنا-آتاسی دؤولت دایره‌لرین‌ده چالیشیر و بو قونودا اصرار ائد‌جک اولسالار ایشده‌ن چیخاریلابیلرلر. بعضی عائله‌لر تورکجه آد قویا بیلمه‌یینجه اوشاقلارینین کیملیگینه فارسجا آد یازدیریرلار اما ائوده تورکجه آدلا چاغیریرلار. اوخولدا باشقا، ائوده باشقا بیر آد. بو قونو اجتماعی و پسیکولوژیک نتیجه‌لری اولان بیر پروبلئم‌دیر. ایران‌لی مسئوللاردان بو پروبلئمین بیر تئزلیکله حل ائدیلمه‌سینی ایسته‌ییریک".
