بایرام تونقالی بیر گون غربی آذربایجاندا اسیر یوردلاریمیزدا دا آلوولاناجاق
آشیق علسگرین ۲۰۰ ایللیک آنما مراسمی چرچیوهسینده ایروان تورک جمهوریتی Hنلاین علمی کنفرانس تشکیل ائتدی
آشیق علسگرین ۲۰۰ ایللیک آنما مراسمی چرچیوهسینده ایروان تورک جمهوریتی آنلاین علمی کنفرانس تشکیل ائتدی.
گیریش سؤزو اوچون چیخیش ائدن ایروان تورک جمهوریتی میللت شوراسینین باشقانی، پروفسور قافار چاخماقلی، «ایروان تورک جمهوریتی آدینا ارمنیستان دئییلهن اراضیده یئتیشمیش بوتون بؤیوک شخصیتلرین تانیدیلماسی، دوغما تورپاقلاردان بوی آتمیش علم، صنعت و اجتماعی-سیاسی شخصیتلرینین خاطرهسینین همیشه اوجا توتولماسی و بو یورد اینسانلارینین بشریته وئردیگی قانقیلارین دقته چاتدیریلماسی بورجوموزدور. آشیق علسگر یالنیز حاق آشیغی دئییل، هم ده باتی آذربایجانین (ایندیکی ارمنیستان جمهوریتینین احاطه ائتدیگی، تاریخاً آذربایجانلیلارینین قالابالیق شکیلده یاشادیغی جغرافی مکان) یئتیشدیردیگی بؤیوک شخصیت، متفکیر و فیلیسوف شاعردیر. اونون یاراتدیغی مکتب دوغولدوغو گؤیچه ماحالی ایله محدودلاشمایاراق بوتون یاخین و اوزاق جغرافیا تورکلویونون شعر، صنعت و ایلهام قایناغینا چئوریلمیشدیر».
تورکیهنین حاجی بکتاش ولی بیلیمیوردو پروفسورو بایرام دوربیلمز ایسه چیخیشیندا آشیق علسگرین صنعت ذیروهسی و آشیقلیغینین تورکیه، گونئی آذربایجان و باشقا بؤلگهلره تأثیریندن دانیشدی و اونون شخصیت اولاراق اؤزللیکلریندن بحث ائتدی.
آشیق علسگرین بؤیوکلویو، اونون قبرینین دوشمن تاپداغی آلتیندا اولماسی و بیر گون اونون مزاری اؤنونده صنعتکارین یاد ائدیلمهسی بوتون قاتیلیمچیلار طرفیندن دیله گتیریلدی و «بو گون شوشادا آلوولانان نووروز تونقالی بیر گون غربی آذربایجانداکی اسیر یوردلاریمیزدا دا آلوولاناجاقدیر» فیکری سسلندیریلدی.
کنفرانسین سونوندا آشیق نعمت و اؤیرنجیسی آشیق عایشهنین ایفاسیندا آشیق علسگرین قوشمالاری اوخوندو.