پرزیدنت علییئو: آذربایجاندا تورک اوردوسونون کیچیک مودلینی یاراداجاییق
"البته کی، آذربایجانا قارشی هر هانسی تهلوکه، تهدید یارانارسا، بیز تام امینیک کی، بیزه آرخا دوران قارداش تورکیه اولاجاق"
آذربایجان پرزیدنتی ایلهام علییئو، «تورکیه سلاحلی قوهلری ایله آذربایجان ساوونما باخانلیغی آراسیندا ایشبیرلیگی اوزون تاریخه صاحبدیر» دئدی.
علییئو ویدئوکنفرانس یولو ایله یئرلی و خاریجی ژورنالیستلرین سواللارینی جاوابلادی.
جمهورباشقانی علییئو، «بوتون دؤورلرده تورکیه و آذربایجان سلاحلی قوهلری بیر یئرده اولدو» دئدی و داوام ائتدی: «من سواللارین بیرینه جاواب وئررکهن دئدیم کی، تکجه ۲۰۱۹-جو ایلده ۱۰-دان چوخ بیرگه حربی مانور کئچیریلدی، هم آذربایجاندا، هم ده تورکیهده. بو ایل ده آرتیق بیرینجی مانور کئچیریلدی. اورتاق مرکزین یارادیلماسی تورک سلاحلی قوهلرینین قاراباغ بؤلگهسینه گلمهسی دئمکدیر، آذربایجان تورپاغینا گلمهسی دئمکدیر. حساب ائدیرهم کی، بو، تاریخی حادثه ساییلا بیلر و بو بیزی چوخ ممنون ائدیر. قئید ائتمهلییهم کی، تورکیه-روسیا اورتاق گؤزلم مرکزینین یارادیلماسی ۳ اؤلکهنین مشترک قراریدیر. ارمنیستان، سادهجه اولاراق، بونونلا راضیلاشمالی اولدو. چونکو ۱۰ نوامبر بیلدیریسی ایمضالاناندا ارمنیستان او دورومدا دئییلدی کی، بونا اعتراض ائتسین. ارمنیستان نئجه دئیرلر، اؤز هاییندا ایدی. اگر باشقا بیر سیاسی و حربی دوروم اولسایدی، ارمنیستان بونا اعتراض ائدردی. آنجاق بونا اعتراض ائده بیلمهدی و بیز ده دئدیک کی، بو مرکز آذربایجان اراضیسینده یارادیلیر، ارمنیستانین نه علاقهسی وار بو ایشلره؟ اونا گؤره بو مرکزین یارادیلماسی تاریخی حادثه ساییلا بیلر. بوندان باشقا، من ده دئمیشدیم کی، تورکیهدن بؤیوک هئیت گلمیشدی، ۱۰۰ نفردن چوخ هئیت ایدی. مینلردن تمیزلهنمه ایشلری و تعلیم کورسلاری آپاریلدی. بو، فعالیت داوام ائتدیریلیر. بوندان سونرا موختلیف ساحهلرده، حربی ساحهده ایشبیرلییمیز داوام ائتدیریلهجک. من ساواش دؤورونده دئمیشدیم و بو، هر کسه بللیدیر کی، تورکیه اوردوسو دونیا میقیاسیندا ان گوجلو اوردولار سیراسیندادیر. ناتودا گوج باخیمیندان ایکینجی اوردودور و بیز ده آذربایجاندا تورک اوردوسونون کیچیک مودلینی یاراتماق عزمیندییک. آرتیق بو ساحهده عملی-عملی ایشلره ایستارت وئریلدی».
پرزیدنت بئله داوام ائتدی، ساواش دؤورونده بیز یئنی تجروبه توپلادیق: «چونکو بیزیم اوردوموز دئمک اولار کی، ساواشلاردا ایشتیراک ائتمیردی و سادهجه، اولاراق بو ساحهیه نظری باخیمدان یاناشیردی. ایندی ساواش چوخ بؤیوک بیر تجروبهدیر و بو تجروبهدن دوزگون نتیجه چیخارمالیییق. بؤیوک اوغورلاریمیز اولدو. عینی زاماندا ساواش دؤورونده معین چاتیشمازلیقلار دا اولدو. بونو دا بیز گیزلتمیریک. ساواش دؤورونده باش قوموتان اولاراق قبول ائتدییم قرارلار، او جملهدن حربی پرسونل ایله باغلی قبول ائدیلمیش قرارلار اونو گؤستریر کی، معین پروبلئملر ده اوزه چیخمیشدی، اما بیز اونلاری حل ائتدیک. تورکیه ایله آذربایجان آراسیندا بیر چوخ سندلر، آنلاشمالار ایمضالاندی. اونلارین آراسیندا ائله سندلر وار کی، اورادا قارشیلیقلی حربی یاردیم مسئلهلری ده تثبیت ائدیلیر. البته کی، آذربایجانا قارشی هر هانسی تهلوکه، تهدید یارانارسا، بیز تام امینیک کی، بیزه آرخا دوران قارداش تورکیه اولاجاق. چونکو بونا امین اولماق اوچون بیر چوخ فاکتورلار، عامللر وار. ساواش دؤورونده، ایلک گونلرده عزیز قارداشیم، سایین پرزیدنتین آچیقلامالاریندا دئدیگی آذربایجان یالنیز دئییل، تورکیه آذربایجانین یانیندادیر سؤزلری بیر چوخلاری اوچون مئساژ اولدو، سیگنال اولدو کی، کناردا دورون، مداخیله ائتمهیین، آذربایجانا مانع اولمایین. بو مئساژلار ایدی. تورکیه ساوونما باخانی، سایین حولوصی آکار، خاریجی ایشلر باخانی، سایین مؤولود چاووشاوغلو، دیگر یوکسک وظیفهلی مقاملار بیر آغیزدان آذربایجانا دستک وئردیلر. بو بیزه چوخ بؤیوک سیاسی و معنوی دستک اولدو. عینی زاماندا بوتون دونیایا بیر سیگنال اولدو کی، کناردا دورون، مداخیله ائتمهیین. بو گون ده بو داوام ائدیر. تورکیه و آذربایجان ایکی قارداش اؤلکه کیمی دونیا میقیاسیندا بیر بیرینه ان یاخین اولان اؤلکهلردیر. بیزیم حربی ایشبیرلییمیز گوندنگ ونه مؤحکملنیر. تورکیهدن یئنی سلاحلارین آلینماسی یولوندا ایشلر آپاریلیر. او سلاحلار یاخین زامانلاردا گلهجک. بیزیم اوردوموز داها گوجلو داها چاغداش اولمالیدیر. تورکیه سلاحلی قوهلرینین مودلی بیزیم اوچون ان مقبول مودلدیر. بو ایستیقامتده ده بوندان سونرا برابر چالیشاجاغیق».
بو آرادا ایرانلی بیر قادین قازئتهچینین مغرض چئورهلرین اویدوردوغو قاراباغدا بعضی گروپلارین ساواشدیغی ادعاسینی سوروشماسی اوزرینه پرزیدنت علییئوین وئردیگی ساغلام جاواب سوسیال مئدیادا ویرال اولدو.