بو گون، خوجالی سویقیریمی گونودور
بو فاجعه، آذربایجان خالقینا قارشی دهشت‌لی بیر سوی‌قیریم‌دیر
خوجالی سویقیریمی ۱۹۹۲.جی ایل فوریه‌نین ۲۵دن ۲۶سینا کئچه‌ن گئجه ارمنیستان سلاح‌لی قوه‌لری، خانکندی شهرین‌ده یئرلشه‌ن روسیانین ۳۶۶.جی آلایینین زره‌لی تکنیک و حربی کادرینین کؤمک‌لیگی ایله، خوجالی شهرینی ایشغال ائدرکه‌ن، آذربایجان‌لیلارا قارشی تؤردیلمیش کوتلوی قیرغین‌دیر.
بو فاجعه آذربایجان خالقینا قارشی دهشت‌لی سوی‌قیری‌می‌دیر. هوجوم‌دان اول، یعنی فورالین ۲۵ی آخشام شهر توپلاردان و آغیر هویتزرلردن شدت‌لی آتیشا توتولموش‌دور. نتیجه‌ده، فوریه‌نین ۲۶سی سحر ساعات ۵ده خوجالی تام آلووا بورونموش‌دور. محاصره‌یه آلینان شهرده قالمیش تقریباً ۲۵۰۰ نفر خوجالی‌لی آغدامین مرکزینه چاتماق اومودو ایله شهری ترک ائتمیشدیر. اما بیر گونون ایچینده یئر اوزون‌دن سیلینه‌ن شهری ترک ائد‌ن ساکینلردن ۶۱۳و دوشمن مرمی‌سینه توش گله‌رک قتل‌عامین قوربانی اولموش‌دور. بو سوی‌قیریم نتیجه‌سین‌ده ۶۳و اوشاق، ۱۰۶سی قادین، ۷۰ی قوجا و قاری اولماقلا، ۶۱۳ نفر خوجالی ساکینی قتله یئتیریلمیش، ۸ عائله تامامیله محو ائدیلمیش، ۲۵ اوشاق هر ایکی والیدینینی، ۱۳۰ اوشاق والیدینلرین‌دن بیرینی ایتیرمیش‌دیر. دوشمن مرمی‌سینه توش گلیب یارالانان ۴۸۷ نفردن ۷۶سی اوشاق اولموش‌دور. ۱۲۷۵ خوجالی‌لی اسیر، ۱۵۰ اینسان ایتکین دوشموش‌دور. دؤولتین و اهالینین املاکینا ۱ آوریل ۱۹۹۲.جی ایل تاریخینه اولان قیمتلرله ۵ میلیارد روبل دیرین‌ده زیان وورولموش‌دور.
۱۹۹۴.جو ایلده‌ن دؤورون آذربایجان پرزیدنتی حیدر علی‌یئوین گیریشیمی ایله آذربایجان حکومتی و پارلمانی ارمننی میللت‌چیلرینین آذربایجان‌لیلارا قارشی تؤرتدیکلری جینایتلر، او جمله‌دن خوجالی سویقیریمی حاقین‌دا حقیقتلری بوتون میقیاسی و دهشتلری ایله دونیا دؤولتلرینه و اولوسلارآراسی توپلوما چاتدیرماق، بونلارین سویقیریمی سیاستی کیمی تانینماسینا نایل اولماق اوچون آردیجیل تدبیرلر گؤرموش‌دور. مقصد خوجالی فاجعه‌سینه اولوسلارآراسی حقوقی، سیاسی قیمت وئریلمه‌سینه، اونون تشکیلات‌چیلارینین، ایدئولوگلارینین و ایجراچیلارینین دونیا اتوپلومونون گؤزون‌ده ایفشاسینا و جزالاندیریلماسینا نایل اولماق‌دیر. بو، خوجالی مدافعه‌چیلرینین و شهیدلرینین روحو قارشی‌سین‌دا بیزیم اینسان‌لیق و وطنداش‌لیق بورجوموزدور.
