قیرغیزیستان-دا یئنی سئچیلمیش پرزیدنتین آند ایچمه مراسیمی کئچیریلیب

یانوارین 28-ده قیرغیزیستان جمهوریتی‌نین یئنی سئچیلن پرزیدنتی سدیر جباروو آند ایچه‌رک وظیفه لرینین ایجراسینا باشلاییب.

مراسیمه میللت وکیل لری، حکومتین عضو‌لری، سابیق پرزیدنت‌لر، کئچمیش پارلامئنت صدرلری و باش ناظیرلر، دیپلوماتیک نوماینده لیک لرین عضو‌لری، اولوسلار آراسی تشکیلات‌لارین، علم، مدنیت و اینجه صنعت خادیم‌لری، یئرلی، خاریجی ژورنالیست‌لر ایشتیراک ائدیب‌لر. عمومیتله مراسیمه 1000-دن چوخ قوناق قاتیلیب.

مراسیمه 5-15 اوکتبر تاریخ‌لرینده کئچیریلمیش کوچه اعتراض آکسیالاریندان‌ سونرا پرزیدنت‌لیک‌دن استعفا ائدن سورنبای جینبکوو دا قاتیلیب.

سدیر جباروو  مرکزی سئچکی کمیسیونونون صدری نورجان شیلدابکووادان دؤولتین رمزلری اولان دؤش نیشانی و پرزیدنت شتاندارتینی آلیب.

قیرغیز بایراغینی تحویل آلان سدیر جباروو  ساغ الینی آنایاسایا قویا‌راق آند ایچیب.

جباروو میللی مارشین سسلندیریلمه‌سیندن سونرا ائتدیگی چیخیشدا"خصوصیله ایکی مین ایلدن چوخ تاریخی اولان خالقیم قارشی‌سیندا بؤیوک مسئولیت حیس ائدیرم" دئییب.

خالقین 5 اوکتبردا قیام قالدیردیغینی و پارلامئنت سئچکی‌لری‌نین نتیجه‌لری‌نین لغو ائدیلمه‌سینی و پرئزیدنت و حکومتین استعفاسینی تعمین ائتدیگینی خاطیرلادا‌راق، "خاوس و قانونسوزلوغون آستاناسیندا اولان اؤلکه‌ده میللی بیرلیگی و باریشی قوروماق اوچون خالقیمیزلا بیرلیکده مسئولیتی اؤز اوزریمیزه گؤتوردوک و اؤلکه‌دکی وضعیتی ثابیتلشدیرمگی باجاردیق" دئیه بیلدیریب.

سدیر جباروو اؤلکه‌نین چتین گون‌لرینده وئردیگی دسته‌یه گؤره روسیایا تشککور ائدیب و قونشو اؤزبکیستان و قازاخیستانلا اورتاق بیر تالعی پایلاشدیق‌لارینی سؤیله‌ییب.

سدیر جباروو استراتژی طرفداشی اولان تورکیه ایله ایش بیرلیگینی گوجلندیرمک اوچون اقتصادی و مدنیت علاقه‌لرینی اینکیشاف ائتدیرمک ایسته‌دیک‌لرینی دیله گتیریب.

چوخ ایستیقامت‌لی خاریجی سیاست یوروتمه‌یی اوستون توتا‌جاق‌لارینی وورغولایان سدیر جباروو  اورتا آسیا اؤلکه‌لری، خصوصاً چین، امریکا و آوروپا اؤلکه‌لری ایله امکداش‌لیق اوچون سعی‌لرین گؤستریله جگینی وورغولاییب.

خاطیرلاداق کی، قیرغیزیستان-دا پرزیدنت سئچکی‌لری ژانویه‌نین 10-دا کئچیریلیب و سدیر جباروو  سئچیجی‌لرین 79،2 فایزی‌نین سسینی قازانیب.