اسماعیلووون جنازه‌سی باکی‌یا گؤندریلدی

نیجریه یاخینلیغین‌دا سالدیرییا معروض قالان موزارت گمی‌سینین چالیشانلاریندان  بیری اولان آذربایجان وطنداشی فرمان اسماعیلووون جنازه‌سی آذربایجانین باشکندی باکی‌یا گؤندریلدی.
سحر ساعاتلارین‌دا تورک هاوا یوللارینا عاید اوچاقلا  گابنون باشکندی لیبرویل‌دن ایستانبول هاوا لیمانینا گتیریله‌ن اسماعیلووون جنازه‌سی، ساعات ۰۷.۳۰دا  تورک هاوا یوللارینین ایستانبول-باکی سفرینه چیخان اوچاقلا باکی‌یا گؤندریلدی.
لیبریا بایراق‌لی موزارت آدلی گمی ۲۳ ژانویه‌ده نیجریه‌نین لاگوس شهرین‌دن تخمیناً ۱۸۰ میل مسافه‌ده دنیز قولدورلارینین سالدیریسینا اوغرادی.
نیجریه‌نین لاگوس شهریندن گونئی آفریقانین کیپ‌تاون شهرینه ایرلی‌له‌ین گمی‌ده‌کی ۱۹ نفر‌دن بیر آذربایجانلی گمیچی اؤلدورولدو و ۱۵ نفر قاچیریلدی.