پرزیدنت علییئو، جواد ظریفی قبول ائتدی
ظریف: آراز چایی‌نین اوتای-بوتاییندا هر زامان سویداشلیق و دوستلوق ایلیشکیسی اولموشدور
آذربایجان پرزیدنتی ایلهام علییئو، ارمنستانین ایشغالیندان قورتاریلمیش بؤلگه‌لرین یئنی‌دن قورولماسینین اؤزل یاتیریمچیلار و دؤولت قوروملاری اوچون گئنیش امکداش‌لیق قاپیلارینی آچدیغینی بیلدیررک،
"یالنیز دوست اؤلکه‌لرله اورتاق اولاجاغیق. ایران شیرکتلرینین جغرافی باخیمدان بیزه یاخین اولماسی، لجستیک و گئنیش تجروبه کیمی آوانتاژلاری وار" دئدی.
علییئو دانیشیقلار آپارماق اوچون باکی‌یا گئدن ایران خاریجی ایشلر باخانی محمد جواد ظریفی قبول ائتدی.
آذربایجان جمهورباشقانلیغی طرفین‌دن وئریله‌ن آچیقلامایا گؤره، علییئو، سون ایللرده ایران ایله آذربایجان آراسین‌داکی اقتصادی، نقلیات و انرژی ساحه‌لرین‌ده یاخشی نتیجه‌لر گؤردوکلرینی سؤیله‌دی.
علییئو، ایشغال‌دان قورتاریلان بؤلگه‌لرین یئنی‌دن قورولماسین‌دا ایشتیراک ائد‌جک شیرکتلر آراسین‌دا ایران شیرکتلرینی گؤرمک‌دن ممنون قالاجاقلارینی بیلدیردی.
ایران خاریجی ایشلر باخانی ظریف ده علی‌یئوی و آذربایجان خالقینی ارمنستان طرفین‌دن ایشغال اولونموش تورپاقلارین قورتاریلما‌سی اوچون تبریک ائتدی و بو غلبه‌نین علییئو لیدئرلیگی و خالقین متانتی سایه‌سین‌ده ممکن اولدوغونو وورغولادی.
آذربایجانین غلبه‌سینین بؤلگه اؤلکه‌لری آراسین‌دا باریشجیل و نورمال ایلیشکیلرین باشلانغیجی اولاجاغینی اومود ائتدیگینی دیله گتیره‌ن ظریف،
"من سیزی ۳ + ۳ امکداش‌لیق فورماتینا (آذربایجان، ارمنستان، گورجوستان، تورکیه، روسیا، ایران) اویقون اولاراق دیگر اؤلکه‌لره ده سفر ائده‌جیم. سیزین باریش اوچون اؤنردیگینیز گؤروشون مذاکره‌سی و گئرچک‌لیگیه چئوریلمه‌سی اوچون چالیشاجاغام. چونکو بؤلگه اؤلکه‌لرینین بیربیری ایله ایش‌بیرلیگی هامیمیزین چیخارینا اویور" ایفاده‌لرینی ایشلتدی.
ظریف، آذربایجانین تورپاق بوتؤولویونون الده ائدیلمه‌‌سی، ایشغالا سون وئریلمه‌سی و آذربایجان‌لیلارین اؤز یوردلارینا قاییتما امکانی تاپماسیندان سونرا نورمال بیر وضعیتین یاراندیغینی بیلدیررک،
"ایران بو مسئله‌ده کؤمک ائتمک نیتینده‌دیر. بیز سیزین دوستونوز اولماقلا یاناشی، یاخین قونشویوق و خالقین گئری دؤنه‌‌جه‌گی بؤلگه‌لرین یئنی‌دن قورولماسی باخیمین‌دان دیگر اؤلکه‌لره گؤره آوانتاژیمیز وار. بیز او اینسانلاری عائله‌میز و سویداشلاریمیز اولاراق قبول ائدیریک. آراز چاینین اوتای-بوتاییندا هر زامان سویداشلیق و دوستلوق ایلیشکیسی اولموشدور. انرژی، عمران و تاریم کیمی ساحه‌لر بیزیم اوچون اؤنجه‌لیکلی و شیرکتلریمیز ایشه باشلاماغا حاضردیر" دئدی.
