آذربایجان تورکو عائله، قیزلارینا تورکجه آد قویماق اوچون آیلاردیر مباریزه ائدیر
سجاد جولانی: بو، سادهجه بیر آد قویما مسئلهسی دئییل، حاق و کیملیک مسئلهسیدیر، اوشاقلاریمیزا اؤز ترجیحیمیز اولان تورک آدلاری قویماق ایستهییریک
ایرانین اردبیل شهرینده یاشایان آذربایجان تورکو موسیقیچیسی سجاد جولانی، تورکجه آد قویماق ایستهدیگی اوچون یئنی دوغولان قیزینا ۷ آیدیر کیملیک آلابیلمیر.
جولانی، آنادولو آژانسینا قیزینا تورکجه آد قویابیلمک اوغروندا آپاردیغی مباریزهدن دانیشدی.
۷ آی قاباق قیزینی قوجاغینا آلان ۳۴ یاشلی جولانی، "قیزیمیزا آذربایجان تورکجهسینده "اویانما" و "دیریلیش" معناسینی وئرهن "آییل" آدینی قویماق ایستهدیک. آنجاق اردبیلدهکی سیجیل ایدارهسی بو آدی اونلارین لیسهسینده اولمادیغی اوچون قبول ائتمهدی. قیزیم ایندی ۷ آیلیقدیر" دئدی.
بونون اوزرینه قونونو تهران ثبت احوال مودورلوگوندهکی ۳ نفرلیک کمیسیونا آپاردیغینی بیلدیرن جولانی، اورادان دا مثبت جاواب آلمادیغینی بیلدیردی.
قیزی اوچون کیملیک آلا بیلمهدیگی اوچون بیمه، خستهخانا خرجلرینی اؤدمیر
قیزینین گؤزلرینین آنادانگلمه کاتاراکت اولدوغونو سؤیلهیهن جولانی، "قیزیمین دا گؤزلرینده کاتاراکت وار. کیملیگینی آلا بیلمهدیگیمیز اوچون بیمه، خستهخانا خرجلرینی اؤدهمیر. قیزیم ۳ دفعه عملیات اولوندو. من کوچه موزیسینییهم. مادی ایمکانلاریمیز محدوددور. خستهخانا خرجلرینی اؤدیهبیلمیریک" دئدی.
جولانی، قیزینا تورکجه آد وئرمکله باغلی اصرارینین سببینی بئله آچیقلادی: "بو، سادهجه بیر آد قویما مسئلهسی دئییل، حاق و کیملیک مسئلهسیدیر. اوشاقلاریمیزا اؤز مدنیتیمیزی یانسیدان و اؤز ترجیحیمیز اولان تورک آدلاری قویماق ایستهییریک" ایفادهلرله دیله گتیردی.
ایراندا "تورکلرین آسیمیله ائدیلمهیه چالشیلدیغی" ادعاسی
ایراندا ۱۹۲۵.جی ایلده باشلایان شاه رضا پهلوی دؤوروندن بو یانا حاکمیته گلن یؤنهتیملرین تورکلری آسیمیله ائتمهیه چالیشدیغینی ادعا ائدن جولانی، بو سورهجین ۱۹۷۹ انقلابیندان سونرا دا داوام ائتدیگینی سؤیلهدی.
جولانی، "یالنیزجا اوشاقلاریمیزین آدلارینا مداخیله ائتمیرلر. تورک جغرافی آدلارینی فارس آدلاری ایله دییشدیریرلر. آغچای-سفیدرود، ساوالان-سبلان، قوشاچای-میاندواب کیمی بیر چوخ یئر آدلاری دییشدیریلدی" دئیه دانیشدی.
جولانی، آذربایجان جمهوریتینین ارمنیستانین ایشغالی آلتینداکی داغلیق قاراباغی قورتارما عملیاتینا دستک گؤستریلرینده ۱ اکتبر ۲۰۲۰ تاریخینده، اردبیلده بیر آی مدتینه گؤزآلتینا آلینمیش سونرا شرطی اولاراق سربست بوراخیلمیشدی.
ایراندا دؤولتین الینده یئنی دوغولموش اوشاقلارا قویولاجاق آدلارین لیست اولدوغو، عائلهلرین آدلاری یالنیز بو لیستدهکی آدلاری قویابیلهجگی بیلدیریلیر. لیستده محدود ساییدا تورکجه آد اولدوغو حالدا، لیسته داخیل اولمایان بیر آد اوچون ایجازه آلماق لازیمدیر.
ایلگیلیلی خبرلر
آذربایجان جمهوریتیندن رئیسی اوچون باشساغلیغی
آذربایجان جمهورباشقانی ایلهام علییئو، ایران دینی لیدئری علی حامنهاییه باشساغلیغی مئساژی گؤندردی