پرزیدنت علییئو فضولی‌ده یئنی هاوا لیمانینین تملینی آتدی
"نئجه کی، دوشمنی قیسا مدت عرضین‌ده تورپاقلاریمیزدان قوودوق، بیزیم تاریخی دده بابا تورپاغیمیز اولان قاراباغی دا قیسا مدت‌ده برپا ائدجییک"
آذربایجان جمهوریتی پرزیدنتی ایلهام علییئو ۱۴ ژانویه‌ده احمدبی‌لی-فضولی-شوشا اتومبیل یولونون ۲۷.جی کیلومئترین‌ده فضولی-شوشا یولونون، آیریجا فضولی‌ده هاوا لیمانینین تمللرینی آتدی.
پرزیدنت ایلهام علییئو، ائشی مهربان علی‌یئوا و قیزلاری لیلا علی‌یئوا آذربایجانین ایشغال‌دان آزاد ائدیله‌ن مدنیت باشکندی شوشا شهرینه گئتدی.
پرزیدنت ایلهام علییئو مراسیم‌ده دانیشدی:
"فضولی اولوسلارآراسی هاوا لیمانی بو ایل ایستیفاده‌یه وئریلمه‌لی‌دیر. هر حال‌دا اوچوش-ائنیش باندی بو ایل ایستیفاده‌یه وئریلمه‌لی‌دیر. هاوا لیمانینین بیناسی ایسه اولا بیلر بو ایل، اولا بیلر گلن ایل ایستیفاده‌یه وئریله‌جک. بو هاوا لیمانینین اساس مقصدی خاریجی قوناقلارین شوشایا گلیشینی تامین ائتمک‌دیر. چونکو بورادان شوشایا اولان مسافه او قدر ده بؤیوک دئییل. نظره آلساق کی، بو گون فضولی-شوشا دؤردزولاق‌لی و بعضی یئرلرده آلتی‌زولاق‌لی یئنی اتومبیل یولونون تملی قویولوب، خاریجی قوناقلار فضولی اولوسلارآراسی هاوا لیمانینا گله‌رک، چوخ راحت و قیسا مدت عرضین‌ده شوشا شهرینه گئده‌بیله‌جکلر.
آزاد ائدیلمیش تورپاقلاریمیزدا ایکینجی اولوسلارآراسی هاوا لیمانی کلبجر و یا لاچین اراضی‌سین‌ده اینشا ائدیله‌جک. ایندی یئر سئچیلیر و بئله‌لیکله، ایکی اولوسلارآراسی هاوا لیمانینین تیکینتی‌سی یاخین زامانلاردا تامین ائدیلمه‌لی‌دیر.
بؤیوک قاییدیش باشلاییر، بوتون ایشلره استارت وئریلدی. امینم، نئجه کی، دوشمنی قیسا مدت عرضین‌ده تورپاقلاریمیزدان قوودوق، -توپلام ۴۴ گون‌ده- بیزیم تاریخی دده بابا تورپاغیمیز اولان قاراباغی دا قیسا مدت‌ده برپا ائدجییک.
قاراباغ آذربایجان‌دیر!"
