تورک کنهشی اوفیسی آچیلدی
"تورک شوراسی، تکجه تورک اؤلکهلری آراسینداکی ایلیشکیلری دئییل، ماجاریستان ایله اولان ایلیشکیلری ده گوجلندیرهجکدیر"
ماجاریستانین باشکندی بوداپستده تورک اؤلکهلری امکداشلیق شوراسینین (تورک کنهشی-تورک شوراسی) تانیتیم اوفیسی خیدمته گیردی.
باشکند بوداپستده دوزنلنن آچیلیش پروگرامینا، خاریجی ایشلر باخانی مؤولود چاووشاوغلو، ماجاریستان خاریجی ایشلر و خاریجی تیجارت باخانی پیتر سیارتو، قیرقیزیستان خاریجی ایشلر باخانی چنگیز آیداربکوو، آذربایجان خاریجی ایشلر باخانی ائلمار ممدیاروو، قازاقیستان خاریجی ایشلر باخانی مختار تلئوبئردی و تورک کنهشی باش کاتیبی بغداد امرهیئو قاتیلدی.
باخان چاووشاوغلو، بورادا چیخیشیندا،
"تورکجه دانیشان خالقلار و بیزیم اوچون قورور وئریجی بیر گون چونکو بو اوفیسین آچیلماسی ایله تورک شوراسینین اؤنمینی داها دا آرتیر. بو عائله بؤیویور، اؤزللیکله گؤمروک، تیجارت، آلت یاپی ساحهلرینده تورک شوراسینین رولو چوخ اؤنملیدیر" دئدی.
تورکییه و ماجاریستان آراسیندا ایلیشکیلرین سون درجه یاخشی وضعیتده اولدوغونو بیلدیرن چاووشاوغلو، ماجاریستانین اسکی گلهنکلری یاشاتماق قونوسوندا اؤنملی رول اوینادیغینا توخوندو.
تورک کنهشی اوفیسینین بوداپستده آچیلماسینین ماجاریستان ایله عینی دگرلرین پایلاشیلدیغینین بیر گؤستریجیسی اولدوغونو بیلدیرهن مؤولود چاووشاوغلو،
"تورک شوراسی، تکجه تورک اؤلکهلری آراسینداکی ایلیشکیلری دئییل، ماجاریستان ایله اولان ایلیشکیلری ده گوجلندیرهجکدیر. اوفیسین، تورک دونیاسی ایله آوروپا خالقلاری و قوروملاری آراسینداکی ایلیشکیلری ده گوجلندیرهجگینه، ایکی جغرافیادا فعالیت گؤسترهن ایش آداملاری آراسینداکی قارشیلیقلی ائتکیلهشیمی آرتیراجاغینا اینانیرام" ایفادهلرینی ایشلتدی.
آذربایجان خاریجی ایشلر باخانی ممدیاروو ایسه، ماجاریستانین تورک شوراسی ایله اولان ایلیشکیلرینی گوجلندیرمک اوچون آتدیغی آددیملاردان دولایی سئوینج دویدوغونو سؤیلهدی.
ماجاریستان خاریجی ایشلر و خاریجی تیجارت باخانی سیارتو دا اؤلکهسینین هر زامان دوغو و باتینین امکداشلیق ائتمهسی اوچون چالیشدیغینی و تورک شوراسینین بوداپستده اوفیس آچماسی قرارینین دا بونو اثبات ائتدیگینی دئدی.
قیرقیزیستان خاریجی ایشلر باخانی آیداربکوو ده، بوداپست اوفیسینین تورک شوراسی و ماجاریستان آراسیندا ایلیشکیلری گوجلندیرمک اوچون یارارلی اولاجاغینا ایناندیغینی بیلدیردی.
قازاقیستان خاریجی ایشلر باخانی تلئوبئردی ایسه ماجاریستانین تورک شوراسینا گئچن ایل گؤزلمچی عضو اولدوغونو، بو گون ایسه آوروپادا تورک شوراسینین اوفیسینین آچیلدیغینی دیله گتیردی.
تورک شوراسینین باش کاتیبی امرهیئو ده دانیششماسیندا، بوداپستده آچیلان اوفیس ایله تورک کنهشینین داها دا بؤیویوب، گوجلندیگینی و بو گونون تاریخی بیر گون اولدوغونو دئدی.