گلهنکسل ایدمانلارین احیاسی
۲.جی گلهنکسل ایدمانلارین احیاسی توپلانتیسی قازاقیستانین آلماتی شهرینده باشلادی
قازاقیستانین آلماتی شهرینده "معنوی یئنیلنمه، گلهنکسل ایدمانین گلیشدیریلمهسی" قونولو ۲.جی گلهنکسل ایدمانلارین احیاسی فورومو باشلادی.
دونیا ائتنوسپور کنفدراسیونو طرفیندن تورک امکداشلیق و کووردیناسیون آژانسی باشقانلیغی(تیکا) و قازافیستانین سامروک قازینا اولوسال ریفاه وقفینین دستگی ایله گئچیریلهن توپلانتینین آچیلیش مراسیمینده گنجلر و ایدمان باخانی محمد محرم قصاباوغلو، دونیا ائتنوسپور کنفدراسیونو باشقانی بلال اردوغان، خاریجی ایشلر باخان یاردیمچیسی یاووز سلیم قیران، تورک اؤلکهلری امکداشلیغی شوراسینین (تورک شوراسی) باش کاتیبی باغداد آمرئیئو، تورک هاوا یوللاری یؤنتیم قورولو و ایجرا کمیتهسینین باشقانی ایلکار آیجی و قازاقیستان مدنیت و توریزم باخانی آریستانبک محمدیولی ایله یاناشی چوخ ساییدا دعوتلی قاتیلدی.
قازاقیستان مدنیت و توریزم باخانی محمدیولی، مراسیمده ائتدیگی چیخیشیندا، گلهنکسل ایدمانلاری و مدنی دگرلری جانلاندیرماغین واجیبلیگینی وورغولادی.
تورک شوراسینین باش کاتیبی آمرئیئو ایسه گلهنکسل ایدمانلارین، عادت، عنعنه، خالقلار آراسی دیپلوماسی کیمی اؤنملی یؤنلری داشیدیغینی سؤیلهدی.
توپلانتی چرچیوهسینده دوققوز داش کومالاک اویونو، آشیق آتما کیمی گلهنکسل ایدمانلاریندان اؤرنکلر گؤستریلدی و اوشاغین بئشییه یاتیردیلماسی مراسیمی ائدیلدی. فورومدا قازاقیستانین میلی یئمکلری سونولدو و گلهنکسل موسیقی آلتلری تانیدیلدی.
بئش پانلدن عبارت اولان و ۳۰ اؤلکهدن ۱۵۰ نمایندهنین ایشتیراک ائتدیگی فورومدا دونیادا گلهنکسل ایدمانلارین گلیشدیریلمهسی، ۲۰۲۰ده تورکیهده گئچیریلهجک ۴.جو دونیا کؤچری اویونلارینین دۆزنلهمه یؤنتملرینین یاخشیلاشدیریلماسی و ائتنوسپورون گۆنجل قونولاری اله آلینیر.
۲.جی گلهنکسل ایدمانلارین احیاسی توپلانتیسی، یارین باشا چاتاجاق.