روسیه‌ده داشقینلار و سولار آلتیندا قالان ائولر

روسیه‌ده داشقینلار نتیجه‌سینده سولار آلتیندا قالان ائولرین سایی 15 مینی کئچیب.

روسیه‌ خبر آژانسینا دانیشان روسیه‌ فوق‌العاده حاللار ناظیرلیگینین مسئوللارینین معلوماتینا گؤره، 33 بؤلگه‌ده 193 یاشاییش منطقه‌سی چای داشقینلاریندان ضرر گؤروب.

سو آلتیندا قالان ائولرین سایی 15 مین 641-ه یوکسلرکن، باغچالارین سایی 4 مین 13-ه چاتیب.

روسیه‌نین کورقان بلدیه‌سی طرفیندن وئریلن آچیقلامادا سویون شهره دوغرو ایرلیلدیگی بیلدیریلیب و وطنداشلارین تخلیه ائدیلمه‌سینه چاغیریلیب.

داشقین تهلوکه‌سی ا‌یله علاقه‌دار فوق‌العاده وضعیت اعلان ائدیلن تومن ویلایتینین 8 یاشاییش منطقه‌سینده تخلیه‌لره باشلاندیغی بیلدیریلیب.

تومن ویلایتینین والیسی آلکساندر مور بیلدیریب کی، ایشیم چاییندا سویون سویه‌سی 10 متره چاتا بیلر.

روسیه‌نین اورنبورگ ویلایتینین اورسک شهرینده آوریلین 6-دا آخشام ساعاتلاریندا اورال چاییندا بندین پارتلاماسی نتیجه‌سینده 2400-دن چوخ ائوی سو باسیب.

داشقین سببیندن محاصیره‌ده قالان مینلرله اینسانی خیلاص ائتمک اوچون تخلیه‌ ایشلرینه باشلانیلیب.

اؤلکه‌نین دیگر بؤلگه‌لرینده‌ ده چایلار داشماغا باشلاییب.

اؤتن هفته‌ روسیه‌ پرزیدنتی، ولادیمیر پوتین داشقینلارلا علاقه‌دار حؤکومته خوصوصی کمیسیون یاراتماغی تاپشیرمیشدی.

داشقین تهلوکه‌سی ا‌یله علاقه‌دار آوریلین ۸-ده کورقان و تومن ویلایتلرینده فوق‌العاده وضعیت اعلان ائدیلیب، بعضی یئرلرده مووقتی مسکونلاشما مرکزلری یارادیلیب و تخلیه‌لره باشلانیلیب.