اؤزبکیستان-بلاروس ایلیشکلری
اؤزبکیستان-بلاروس ایلیشکیلری سون ایللرده هر ساحهده اینکیشافا باشلادی
۷-۹ فوریه ۲۰۲۴ تاریخلرینده بلاروس جمهورباشقانی آلکساندر لوکاشئنکو اؤزبکیستانا رسمی سفر گئرچکلشدیردی. ۸ فوریه تاریخینده داشکند شهرینده ایکی اؤلکه جمهورباشقانلاری باش باشا و هئیئتلر آراسی گؤروشمهلر ائتدیلر. بلاروسون شانگهای امکداشلیق تشکیلاتینا تام عضولوگو قونوسو دا جمهورباشقانلارینین گؤروشمه گوندمیندهکی قونولار آراسیندا ایدی. گؤروشمهلر سونوندا جمهورباشقانلاری ایکی اؤلکه ایلیشکیلرینین اینکیشاف ائتدیریلمهسی قونوسوندا اورتاق بیلدیری ایمضالادیلار. داشکند شهرینده اؤزبکیستان و بلاروس آراسیندا جمعی ۱۴ آنلاشما ایمضالاندی. اؤزبکیستان جمهورباشقانی میرضیایئوین ۲۰۱۹.جو ایلده بلاروسا گئرچکلشدیردیگی رسمی سفرده ایکی اؤلکه آراسیندا ۱۳ آنلاشما ایمضالانمیشدی.
جمهورباشقانلاری داشکند شهرینده اولان تخنوپارکی بیرلیکده گزدیلر. شؤوکت میرضیایئو و آلکساندر لوکاشئنکونون بیرلیکده اسکی ائتمهسی و هوُمو آرئنایا گئدهرک هاکی اویونو ایزلهمهلری، لیدئرلر آراسیندا گۆوهنین قورولدوغونو، بو وضعیتین ایکیلی ایلیشکیلرین اینکیشافینا اؤنملی قاتقی تامین ائدجگینی سؤیلهیهبیلریک.
سفر چرچیوهسینده اؤزبکیستاندا اؤزبکیستان-بلاروس حکومتلرآراسی کمیسیون ییغینجاغی، اؤزبکیستان-بلاروس بؤلگهلرآراسی ۲.جی فورومو، اؤزبکیستان-بلاروس اونیوئرسیته رئیسلری فورومو و اؤزبکیستان-بلاروس ساغلیق قورولوشلاری ایدارهچیلری ییغینجاغی گئرچکلشدیریلدی. اؤزبکیستان-بلاروس بؤلگهلرآراسی ۲.جی فوروموندا ایکی اؤلکه آراسیندا ۱ میلیارد دلارلیق آنلاشمالارین ایمضالاندیغی آچیقلاندی.
ایکی اؤلکه اورتاق تیجارت حجمی ۶۲۰ میلیون دلارا چاتمیش دورومدادیر. موقایسه ائتمک لازیم ایسه، ۲۰۱۷.جی ایلده اؤزبکیستان-بلاروس اورتاق تیجارت حجمی ۱۳۰ میلیون دلار ایدی. جمهورباشقانلاری بو رقمی ۲۰۲۶.جی ایله قدر ۱ میلیارد دلارا چیخارما تلاپشیریغی وئردیلر.
اؤزبکیستان و بلاروس آراسیندا سون ایللرده قورولان اورتاق شیرکتلرین ساییسی دؤرد قات آرتمیشدیر. طرفلر بو ساحهده امکداشلیغی اینکیشاف ائتدیرهرک اوچونجو اؤلکهلره محصول صادر ائتمهیی هدفلهییرلر. ایکی اؤلکه آراسیندا اکینچیلیک، درمانچیلیق، آغیر صنایع، گئییم و تیکیم ساحهسینده امکداشلیق ان اوست سویهده اینکیشاف ائتمکدهدیر.
***
اؤزبکیستان و بلاروس سووئتلر دؤنمینده یاخشی شکیلده امکداشلیق ائدیردیلر. آنجاق اؤزبکیستان مینسک ائلچیلیگینین ۲۰۱۸.جی ایلین مارس آییندا آچیلدیغینی، اؤزبکیستان جمهورباشقانلاری ایسلام کریموو و شؤوکت میرضیایئوین بیر دفعه بلاروسا، بلاروس جمهورباشقانینین سون ۳۰ ایلده یالنیز ۳ دفعه اؤزبکیستانا رسمی سفر گئرچکلشدیردیکلرینی حسابا قاتارساق، اؤزبکیستان-بلاروس ایلیشکیلرینین موستقیللیک ایللرینده چوخ دا اوست سویهده اولمادیغینی سؤیلهیهبیلریک. شؤوکت میرضیایئوین جمهورباشقانی اولماسیندان سونرا ایکی اؤلکه ایلیشکیلری سرعت قازانماغا باشلادی. ۲۰۲۳.جو ایلده اؤزبکیستان و بلاروسون مجلیس باشقانلاری و باش باخانلاری گؤروشمه گئرچکلشدیردیلر.
بلاروسلارین داشکندده سویتاناک آدلی مدنیت مرکزی فعالیت یئریدیر. اؤزبکیستاندا یاشایان بلاروسلارین ساییسی ۱۸ میندن چوخدور. اؤزبک اؤیرنجیلر چینلیلردن سونرا بلاروسدا یوکسک تحصیل گؤرهن ان قالابالیق ایکینجی اؤیرنجی توپلولوغو قونوموندادیرلار.
اؤزتلهیهجک اولساق، اؤزبکیستان-بلاروس ایلیشکیلری سون ایللرده هر ساحهده اینکیشافا باشلادی. بلاروس، اؤزبکیستان اوزریندن گونئی آسیایا یول آچماق ایستهییر. آوروپا اؤلکهلری ایله یاشانان بحران بلاروسون گونئی دوغو اؤلکهلرینه اوداقلانماسینی ضروری قیلیر. بلاروس جمهورباشقانی آلکساندر لوکاشئنکونون اؤزبکیستان سفری بو باخیمدان بؤیوک اؤنم ایفاده ائدیر.