تۆرک جمهوریتلرینده گئچهن هفته
اوچلو ذیروه و ایش فورومو، قویولان قارشیلیقلی سرمایهلر تۆرک جمهوریتلری آراسیندا امکداشلیغی گوجلندیریر
تۆرک جمهوریتلرینده گئچهن هفته اؤنه چیخان ان اؤنملی گلیشمه اولاراق تۆرکمنیستاندا گئرچکلشن اوچلو ذیروهنی سؤیلهیهبیلریک. ۱۴ دسامبر ۲۰۲۲ تاریخینده تۆرکمنیستانین آوازا توریزم بؤلگهسینده آذربایجان، تۆرکیه و تۆرکمنیستان جمهورباشقانلارینین اوچلو ذیروهسی گئرچکلشدیریلدی. آوازا کنگره مرکزینده گئرچکلشن ذیروه نتیجهسینده، تیجارت، بیلیم، تحصیل، مدنیت، گؤمروک، انرژی و نقلیات ساحهلرینده بئش آنلاشما ایمضالاندی. ذیروه ایله باغلی ۲۵ مادهدن عبارت اولان اورتاق بیلدیری یاییملاندی. ذیروهدهکی دانیشماسیندا جمهورباشقانی رجب طیب اردوغان، تۆرکمن طبیعی گازینین باتی بازارلارینا نقلینه دایر چالیشمالار آرتیق باشلانماسی لازیم اولدوغونو بیلدیردی.
آوازادا اوچ اؤلکه جمهورباشقانلاری بیر بیرلری ایله آیری آیری گؤروشمهلر گئرچکلشدیردیلر. تۆرک دؤولتلری تشکیلاتی باش کاتیبی کوبانیچبک عؤمورعلییئو، آذربایجان، تۆرکیه و تۆرکمنیستان آراسینداکی ایلیشکیلرین گئنیشلدیلمهسینین تۆرک دؤولتلری تشکیلاتی دؤولتلری آراسینداکی مؤوجود گوجلو دایانیشمانی گوجلهندیرمهیه خیدمت ائدجگینی و تۆرک دونیاسینی بیرلشدیرمه و بۆتونلشدیرمه مدتینده ایرلییه دوغرو آتیلان چوخ اؤنملی بیر آددیمی اولوشدوراجاغینی ایفاده ائتدی.
اوچلو ذیروه اولینده تۆرکمنیستان جمهورباشقانی سردار بردیمحمدوو اؤزبکیستان جمهورباشقانی کؤمکچیسی ساردور اومورزاکووو قبول ائتدی. ۱۲ دسامبر تاریخینده گئرچکلشن گؤروشمهده ایکیلی و بؤلگهسل مسئلهلر اله آلیندی. اؤزبکیستانین اوچلو ذیروهنی دقتله ایزلهدیگینی سؤیلهیهبیلریک.
۱۲ دسامبر ۲۰۲۲ تاریخینده چوخ ساییدا آذربایجانلی و چئورهچی مدنی قورولوش، ارمنیستاندان قاراباغا گئدن تک یول اولان لاچین کوریدورونو نقلیاتا باغلادی. گؤستریچیلر، قاراباغداکی طبیعی قایناقلارین حقوقا ضد شکیلده ایستیفاده ائدیلمهسینین اؤنلهنمهسی و بونون چئوره اوزریندهکی منفی تاثیرلرینین اورتادان قالدیریلماسینی طلب ائدیر. قاراباغدا اولان قیزیل و بعضی قیمتلی داش معدنلرینی روسیالی، کانادالی و اینگیلیس شیرکتلری ایشلهدیر. باکی یؤنهتیمی، آذربایجانلی متخصصلر طرفیندن بؤلگهده ایش گؤرولمهسی قراری آلمیش و هیئتین ایش گؤرمهسینه روس باریش گوجو مانع اولموشدو. یاشانان بو وضعیتله باغلی آذربایجان خاریجی ایشلر باخانلیغی طرفیندن روسیایا اعتراض یازیسی وئریلمیشدی. بؤلگهده وضعیت گرگینلیگینی قورویور.
۱۵ دسامبر ۲۰۲۲ تاریخینده آذربایجان جمهورباشقانی ایلهام علییئو، تۆرک دؤولتلر تشکیلاتی باش کاتیبی کوبانیچبک عؤمورعلییئوی قبول ائتدی. گؤروشمهده تۆرک دؤولتلر تشکیلاتینین گوندمیندهکی مؤوضوعلار اله آلیندی.
***
تاتاریستان جمهورباشقانی روستم میننیخانوو، تۆرک جمهوریتلرینه ائتدیی سفرلرینی داوام ائتدیریر. ۱۲ دسامبر ۲۰۲۲ تاریخینده جمهورباشقانی میننیخانوو، بورسایا سفر گئرچکلشدیردی. بورسا دا تۆرکیه-تاتاریستان ایش فورومو تشکیل ائدیلدی.
۱۳ دسامبر ۲۰۲۲ تاریخینده قازاقیستان جمهورباشقانی قاسیم جومرت توکایئو، تاتاریستان جمهوریت باشقانی روستم میننیخانووو قبول ائتدی. گؤروشمهده ایکیلی ایلیشکیلری داها دا گلیشدیرمهنین ایمکانلاری اله آلیندی. جمهورباشقانی میننیخانوو، قازاقیستانین ساران شهرینده تاتاریستانین ۴۰۰ میلیون دلارلیق سرمایهسی ایله تیکیلهن لاستیک فابریکاسینین ایشه باشلادیغینی بیلدیردی.
گلیشمهلردن گؤرولدویو اوزره گئچهن هفته تۆرک جمهوریتلری باخیمیندان حرکتلی گئچدی. اوچلو ذیروه و ایش فورومو، قویولان قارشیلیقلی سرمایهلر تۆرک جمهوریتلری آراسیندا امکداشلیغی گوجلندیریر.