تۆرکمنیستان جمهورباشقانی سردار بردیمحمدووون اؤزبکیستان سفری
جمهورباشقانی سردار بردیمحمدوو ایلک خاریج دؤولت سفرینی قارداش اؤزبکیستانا گئرچکلشدیردی
اؤزبکیستان جمهور باشقانی شؤوکت میرضیایئوین دعوتی اوزرینه تۆرکمنیستان جمهورباشقانی سردار بردیمحمدوو ۱۴-۱۵ جولای ۲۰۲۲ تاریخلرینده اؤزبکیستانا سفر گئرچکلشدیردی. تۆرکمنیستان جمهورباشقانی سردار بردیمحمدووو داشکندده اؤزبکیستان باشباخانی عبدالله آریپوو قارشیلادی. تۆرکمنیستان جمهورباشقانی بردیمحمدوو اؤنجه یئنی اؤزبکیستان پارکینا گئدهرک چلنگ بوراخدی.
اؤزبکیستان جمهورباشقانی شؤوکت میرضیایئو کوکسارایدا جمهورباشقانی بردیمحمدووو رسمی مراسیم ایله قارشیلادی. اؤزبکیستان و تۆرکمنیستان جمهورباشقانلاری رسمی مراسیمدن سونرا باش-باشا گؤروشدولر. داها سونرا هیئتلر آراسی گؤروشمه گئرچکلشدیریلدی. گؤروشمهلردن سونرا ایکی اؤلکه آراسیندا بیلیم، صنایع، توریزم، اکینچیلیک، نقلیات، اقتصاد کیمی فرقلی ساحهلرده ۱۹ آنلاشما ایمضالاندی.
آچیقلامالار وئرن اؤزبکیستان جمهورباشقانی شؤوکت میرضیایئو، ۲۰۲۱.جی ایلده ایکی اؤلکه آراسینداکی اورتاق تیجارت حجمینین ۹۰۲ میلیون دلار اولاراق گئرچکلشدیگینی، ۲۰۲۲.جی ایلده بو رقمی ۱ میلیاردا چاتدیرماغی هدفلدیکلرینی، ایکیلی تیجارت حجمیندهکی آرتیشین ایلک دفعه بئله یوکسک رقمی یاخالادیغینی بیلدیردی.
تۆرکمنیستان جمهورباشقانی بردیمحمدوو سفر چرچیوهسینده داشکندده اؤزبکیستان عالی مجلیسی سناسی باشقانی تانزیلا ناربایئوا ایله گؤروشدو. گؤروشمهده ایکیلی ایلیشکیلری ماراقلاندیران قونولاردا فیکیر آلیش وئریشی ائدیلدی.
۱۵ جولای تاریخینده ایکی اؤلکهنین لیدئرلری سمرقنده گئتدیلر. جمهورباشقانلاری سمرقندی بیرلیکده گزدیلر.
بورادا بونو دا بیلدیرمهلیییک کی، بردیمحمدووون سفری چرچیوهسینده اؤزبکیستاندا موختلیف فعالیتلر تشکیل ائدیلدی. ۱۳ جولای ۲۰۲۲ تاریخینده داشکندده اؤزبکیستان و تۆرکمنیستان: امکداشلیغین یئنی تاریخی مرحلهسینده قالخینما پرسپکتیولری آدلی اولوسلارآراسی کنفرانس گئرچکلشدیریلدی. کنفرانسدا ایکی اؤلکه ایلیشکیلری ایله باغلی موختلیف قونولار موذاکیره ائدیلدی.
۱۲-۱۴ جولای تاریخلرینده ایسه بخارادا اؤزبک-تۆرکمن بؤلگهسل فورومو گئرچکلشدیریلدی. فورومدا ایکی اؤلکه آراسیندا ۴۵۱ میلیون دلارلیق آنلاشمالارین ایمضالاندیغی بیلدیریلدی. فوروم چرچیوهسینده اؤزبک-تۆرکمن ایش شوراسی ییغینجاغی ائدیلدی.
*
داشکندده ایکیلی ایلیشکیلری گوجلهندیرهجک اؤنملی آنلاشمالار ایمضالاندی. یالنیز بؤلگهده دئییل، بوتون دونیادا سرحد آشان سولارین ایستیفادسی ایله باغلی پروبلئملر وار. اؤزبکیستان و تۆرکمنیستان جیحونون سویونو قناعتلی ایستیفاده ائتمه قونوسوندا آنلاشدیلار. آرالین قورودوغو، بؤلگهنین چؤللشمهیه داوام ائتدیگی حسابا قاتیلیرسا، ایکی اؤلکه آراسیندا واریلان بو آنلاشما، سویون ایستیفادهسی قونوسوندا اولاسی آنلاشیلمازلیقلاری آرادان قالدیرما باخیمیندان بؤیوک اؤنم ایفاده ائدیر.
داشکندده سرحد بؤلگهسینده تیجارتی گلیشدیرمه قونوسوندا یول خریطهسینی تعیین ائدن آنلاشما ایمضالاندی. تۆرکمنیستان و اؤزبکیستانین اقتصادی پتانسیللری بو آنلاشما سایهسینده قوللانیلمیش اولاجاق. آیریجا طرفلر قارشیلیقلی تیجارت ائولرینی آچماغی پلانلاییرلار.
نقلیات، ایکی اؤلکه باخیمیندان بؤیوک پتانسیل داشییان ساحهلردن بیریدیر. لیدئرلر بو ساحهده مؤوجود ایمکانلاردان ایستیفاده ائتمه و امکداشلیغی ان اوست سویهیه چیخارتما قونوسوندا آنلاشدیلار.
شؤوکت میرضیایئو تۆرکمن قونومداشینی سپتامبر آیی اورتاسیندا سمرقندده ائدیلهجک شانگهای امکداشلیق تشکیلاتی ذیروهسینه شرف قوناغی اولاراق قاتیلماغا دعوت ائتدی. بئله دعوت ان یاخین امکداشلیغینا صاحب اؤلکهلر آراسیندا ائدیلیر.
اؤزتله، جمهورباشقانی سردار بردیمحمدوو ایلک خاریج دؤولت سفرینی قارداش اؤزبکیستانا گئرچکلشدیردی و بو سفر چوخ وئریملی گئچدی.
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی