۳ مین دیل یوخ اولما تهلوکهسی ایله قارشی قارشیادی
"اولوسلارآراسی آنا دیلی گونو"، بنگلادشین گیریشیمی ایله ۱۹۹۹دا یونسکو عمومی کنفرانسیندا اونایلاندی و ۲۰۰۰.جی ایلدهن بو یانا هر ایل ۲۱ فوریه گونو قوتلانیر
دونیا اۆزرینده حاضیردا دانیشیلان ۷ مینین اۆزریندهکی دیلدن تخمیناً ۳ مینی، ۲۱.جی عصرین سونونا قدر یوخ اولما تهلوکهسی ایله قارشی قارشیادیر.
"اولوسلارآراسی آنا دیلی گونو"، بنگلادشین گیریشیمی ایله ۱۹۹۹دا یونسکو (بیرلشمیش میللتلر تحصیل، علم و مدنیت تشکیلاتی) عمومی کنفرانسیندا اونایلاندی و ۲۰۰۰.جی ایلدهن بو یانا هر ایل ۲۱ فوریه گونو قوتلانیر.
یونسکونون بیلگیلرینه گؤره، بو آندا دونیا اۆزرینده ۷ مینین اۆزرینده دیل دانیشیلارکهن، بونلارین ۶ مین ۷۰۰ونو یئرلی خالقلارین دانیشدیغی "دونیا اۆزرینده ان چوخ تهدید آلتیندا اولان" دیللر اولوشدورور.
۲۰۱۹دا قوتلانان بیرلشمیش میللتلر اولوسلارآراسی یئرلی دیللر ایلی چرچیوهسینده قبول ائدیلهن قرار لایحهسینه اویغون اولاراق یونسکو، دؤولتلره یئرلی دیللرین قورونماسی اوچون مالی یاردیم و مکانیزملر قورما چاغریسی ائتدی.
یونسکویا گؤره، یئرلی جمعیت، اؤلکهنین اهالیسینین کیچیک بیر قیسیمینی اولوشدورسا بئله بو توپلوملار، کۆلتورل و دیلسل چئشیدلیلیگین ان بؤیوک بؤلومودور. دیللرین یوخ اولماسی ایسه گئری دؤنولمز بیر شکیلده کوزموپولیتلیگین و اینسانلیغین اورتاق میراثینین یوخ اولماسی معناسینا گلهبیلر.
یونسکو دونیا تهلوکه آلتینداکی دیللر اطلسینه گؤره، ۱۹۵۰دن بو یانا هئچ کیم طرفیندن دانیشیلمایان دیللر، "یوخ اولموش" دیللر اولاراق قبول ائدیلیر.
بیر دیلین "گۆونلی" اولاراق تانیملانماسی اوچون بوتون نسیللر طرفیندن و دیل اۆزرینده هر هانسی بیر قیسیدلاما اولمادان دانیشیلماسی لازیمدیر. بو تصنیفه گؤره، بو گونه قدر دانیشیلان دیللرین یوزده دؤردو "یوخ اولموش" اولاراق ساییلیر.
بو گون دانیشیلان دیللرین یوزده ۱۰و "قایغی وئریجی درجهده تهلوکه آلتیندا"، یوزده ۹و "شدتلی درجهده تهلوکه آلتیندا"، یوزده ۱۱ی "کسینلیکله تهدید آلتیندا"، یوزده ۱۰و "ساوونماسیز" اولاراق تصنیف ائدیلیر. یونسکو، بو دیللرین بو یۆزایلین سونونا قدر یوخ اولابیلهجگی قایغیسی داشیییر.