"آنام بیلن بایاتیلار"
بو ناغیلین قهرمانی «آناخانیم موسوی»دیر
ابراهیم ساوالان:
یولا چیخماق چوخ دا راحات دئییل و یول هر بیر آدامی یورابیلر. هله یئنه ایندیلیکده یوللارین و آرابالارین دورومو آز چوخ یاخشیلاشیب و اینسان اوزون مسافهلری قیسا زاماندا گئدهبیلیر و «یول یورغونو» لوغتی یاواش- یاواش سؤزلوکلرده یوخویا گئدیر. آما اللی- آلتمیش ایل اؤنجه، تبریز- تهران آرابالاری بو یولو 13 ساعاتدا گئدردی، چالا- چوخور و دار دودوک جاددهلر و قوراضا آرابالار مسافیرین سوموکلرینی ده بئله یوراردی.
آما بیر قادین وار ایدی. بو یوللارین هامیسینی یورموشدو و یوللار اونون قاباغیندان موم کیمی یوموشالمیشدی. او بعضن باشماقلارینی گئییب تبریزدن تهرانا گئدیب اوردا دوستاقدا اولان اوغلونو نئچه دایقالیق اولموش اولسا دا دمیر نردهلر آرخاسیندان گؤرمهیه سئوینردی، سونرا باشماقلارینی گئییب شیرازا گئدر و باشقا اوغلونو اورانین دوستاغیندا زیارت ائدردی. بلکه ده یول بوردا بیتمیردی و او بورازجان جهنمینه گئدیب باشقا اوغلونو اوردا گؤرمهلیدی. بو ناغیلین قهرمانی «آناخانیم موسوی»دی و اونون آسلانلاری شاه رژیمینه قارشی فعالیت ائتمیشدیلر. او عباد، نوروز و حمید احمدزاده کیمی موباریز یازارلاری قوجاغیندا بؤیودن آنادیرکی اوغلانلاری شاه قاچاندان بیر گون سونرا، تبریزده بیر سیرا یولداشلاری ایله بیرلیکده، تورکجه «اولدوز» درگیسینی یاییملاییب آدلارینی آذربایجان تاریخینده قیزیل حرفلرله یازدیلار.
ایندی آناخانیم موسوی بام باشقا بیرایشه آددیم آتیب، ان کیچیک یاشلاریندان، بیر قیمتلی خزینه کیمی حافیظهسینده ساخلادیغی بایاتیلاری، اوغلو حمیدین یاردیمی ایله «آنام بیلن بایاتیلار» عنوانلی بیر کیتابدا یاییملاییبدیر. نئجه ده گؤزل و نئجه ده اورهیه یاتان بایاتیلار وار بو کیتابدا.