بیتلیس‌ده سلجوقلو مزارلیغی
سلجوقلو مزارلیغی یونسکونون دونیا مدنیت میراثی اصل لیسته‌سینه گیره‌جک
بیتلیسن آحلات ائلچه‌سینده اولان سلجوقلو میدان قبیریستانلیغین‌داکی 8 مین 200 مزار داشی و اوزرلرینده‌کی قابارتما و اویما ایشلمه‌لر، یونسکونون دونیا مدنیت میراثی اصل لیسته‌سینه گیرمه یولوندا.
اورارتولاردان عثمانلییا قدر بیر چوخ مدنیتین ایزلرینی داشییان، تورکیه‌نین و بؤلگه‌نین اؤنم‌لی توریزم مرکزلری آراسیندا اولان بیتلیسن آحلات ائلچه‌سی، تاریخی اثرلری ایله اؤن پلانا چیخیر. تورک‌لرین آنادولویا گیریشی‌نین قاپی‌سی اولان و "آنادولونون قباله‌سی" اولا‌راق بیلینن آحلات، ائلچه‌یه گلن یئرلی و خاریجی توریست‌لری تاریخی بیر سفره چیخاریر.
دونیاداکی اوچ "قبه الاسلام" یئریندن بیری اولان و تاریخی اثرلریله آچیق هاوا موزه‌سینی آندیران آحلاتدا، سلجوقلو میدان مزارلیغینداکی 8 مین 200 سین/مزار داشی و اوزرلرینده‌کی قابارتما و اویما ایشلمه‌لر، ساحل قالاسی ایله گنبدلر، قوناقلارین ایلگی‌سینی چئکیر.
مدنیت و توریزم باخانلیغینین، شهرین توریزمینده اؤنم‌لی بیر یئر توتان سلجوقلو میدان مزارلیغینین یونسکونون دونیا مدنیت میراثی گئچیجی لیسته‌سین‌دن، اصل لیسته‌یه آلینماسی اوچون باشلادیلان ایشلر داوام ائدیر.
یوزونجو ایل اونیورسیته‌سی اینجه صنعت تاریخی بؤلومو باشقانی پروفسور دکتر رجایی قاراخان باشقانلیغیندا آپاریلان قازینتی ایشلرینده یئنی مزارلار تثبیت ائدیلرکن، ایندییه قدر 600 اییک مزار داشی دا دوزلدیلدی.
