هفتهنین آنالیزی - 10
ستا-دا وظیفهلی دوچنت دوکتور مراد یشیلتاشین "باهار قالخانی" حرکاتی آدلی آنالیتیک یازیسی
سون هفتهلرده مرکزی ادلیب اولماقلا باش وئرنلر سوریه موناقیشهسینین یئنی بیر مرحلهیه داخیل اولدوغونو گؤستریر. روسیانین دستکلدیگی اسد رژیمینه باغلی قورو و هاوا عنصورلارینین ادلیب-ده ایستراتژی موضع ده کی م4 و م5 یوللارینین نظارتینی اله کئچیرمک تشببوسلرینه تورکیه-نین سرت مقاومت گؤسترمهسی ادلیبی بیر آندا دونیانین گوندمینه اوتورتدو. ان سون 27 فوریه تاریخینده اسد رژیمینه صادق هاوا عنصورلارینین تورکیه سلاحلی قوهلرینی هدفه آلماسی نتیجهسینده تورکیه-نین 33 حربی قوللوقچوسونون شهید ائدیلمهسی ادلیب بحرانینی داها دا درینلشدیردی و تورکیه-نین رژیمه چوخ سرت و گنیش میقیاسلی جاواب وئرمهسینه گتیریب چیخاردی. هاوا هوجومو روسیا طرفیندن ائدیلدی. بو، معلومدور. بونا رغما رسمی آنکارا هوجوما اسد رژیمینین مسئولیتی کیمی باخدی و ادلیب اطرافیندا رئژیمه جدی ایتکیلر وئردیردی. بو وضعیت سوریا محاربهسینده ایکی دؤولتین بو سویهده قارشی-قارشییا گلمهسی معناسی داشیییر. بونونلا یاناشی، تورکیه-نین عملیاتی سوریه بحرانی ایله ماراقلانان بوتون اؤلکهلرین مقاملارینی گؤزدن کئچیرمهسینه سبب اولدو.
تورکیه “باهار قالخانی” آدی آلتیندا کئچیردیگی عملیات ایله حقیقی گوجونو ده گؤستردی. سوریه وطنداش محاربهسی مودتینده بو سویهده تورکیه ایله قارشی-قارشییا گلمهمیشدی. تورکیه هاوا مکانینین تورک دؤیوش طیارهلرینه باغلی اولماسینا باخمایاراق، سلاحلی پیلوتسوز اوچوش آپاراتلاریندان (ایسپوا) ایستیفاده ائدهرک سوریه هاوا مکانینا داخیل اولدو و سوریه رژیمینه مخصوص ادلیب اطرافینداکی بوتون حرکتی عنصورلاری محو ائتدی. عملیاتین ایکینجی گونونده سوریه رژیمی اؤز سیرالاریندا ووروشان 2500-دن چوخ (رسمی رقملر) عسگرینی و میلیس عنصورلارینی ایتیردی. بونونلا یاناشی 100-ا یاخین تانکینی تورک هاوا هوجوملاریندا ایتیردیکده، ایکی عدد سو -24 و ل-36 نوع دؤیوش طیارهسی ده تورکیه طرفیندن دوشورولدو. رژیمین ایتکیلری بونلارلا محدود دئییل؛ هاوا مودافعه سیستملری، توپچو باتاریالاری و چوخ سایدا زیره لی تکنیکاسی دا رژیمین ایتکیلری آراسیندادیر. بونونلا دا تورکیه سادهجه عسگرینه ایستیقامتلی هوجوما برابر سویهده جاواب وئرمک عوضینه رژیمین آغیر ایتکیلرینه سبب اولاجاق حربی تاکتیکا و ایستراتژی تعقیب ائتدی. رسمی آنکارا خصوصیله ایسپوا هوجوملاری ایله محاربه تاریخینده یئنی بیر مرحلهیه داخیل اولونماسینی تامین ائتدی.
ایستراتژی نین یئکون هدفی ایسه خیلی آچیقدیر؛ رژیمی اورژینا ل سوچی خطینه گئری چکیلمهیه مجبور ائتمک. آنجاق ساحهدن گلن خبرلر رژیمین آغیر ایتکیلرینین اولماسینا باخمایاراق موضع لریندن چکیلمهیهجکلرینی گؤستریر. نتیجهده م4 و م5 یوللارینا عینی آندا نظارت ائتمهیه یارایان ایستراتژی اهمیته مالیک سراقیب بؤلگهسینه نظارتین داواملی ال دییشمهسی نومونه کیمی گؤستریله بیلر. آیریجا گؤرونور کی، رسمی مسکوا عملیاتین ایلک گونونده رژیمین آغیر ایتکیلری قارشیسیندا هر هانسی موضعی اورتایا قویماسا دا داها سونرا دقیق موضع اورتایا قویدو. سراقیب بؤلگهسینه روسیا حربی پولیسینی جلب ائدن رسمی مسکوا تورکیه-نین عملیاتینین احاته دایرهسینی گئنیشلتمه احتیمالی قارشیسیندا اؤز موجودلوغونو اؤن پلانا چیخاریب. بو، ایستر-ایستمز تورکیه-نین داها دقتلی رفتار ائتمهسینه سبب اولور. چونکی هر ایکی اؤلکه ده بیرباشا قارشی-قارشییا گلهجک توققوشما موحیطیندن طرف دئییللر.
تورکیه اورژینال سوچی موقاویلهسینین سرحدلری بارهده تاکیدله دایاندیقدا، رسمی مسکوانین نیتینین داها فرقلی اولدوغونو گؤروروک. هر ایکی اؤلکهنین ده توققوشمانی شدتلندیرمکدن طرف اولمادیقلاری ایسه آیدین اولوب.
5 مارس دا بیر آرایا گلن پوتین و اردوغان ادلیب بحرانیندا یئنی آتشکس خطینی ایشه سالماقلا بحرانین درینلشمهسینین قارشیسینی آلاراق، 2018-جی ایلده ایمضالانان سوچی راضیلاشماسینا داها 3 ماده علاوه ائتدی. آتشکسین اعلان ائدیلمهسی ایله م4 اتوبانی نین قوزیی ینه و گونئی ینه 6 کیلومتر درینلیکده تهلوکهسیزلیک دهلیزین یارادیلماسی بارهده راضیلیق الده ائدیلدی.
دیگر طرفدن م4 یولو خطینده تورکیه-روسیا بیرگه کئشیک خیدمتلرینین باشلانماسی ایله باغلی راضیلیق الده ائدیلدی. بئلهجه، تورکیه رژیمین و روسیانین داها چوخ ایرهلیلمهسینین قارشیسینی آلاراق یئنی بیر قاچقین بحرانینین اورتایا چیخماسینا اولدو و موخالیفلرین موضع لرینی قوروماق اوچون زامان قازانمیش اولدو.
مسکوا ذیروه سینده ادلیب بحرانینین دایمی حلی اولماسا دا، موقتی بیر فورمولا ایله بحرانین درینلشمهسینین قارشیسی آلیندی. روسیانین و رژیمین بوندان سونرا یئنی بیر هوجوم باشلاتمایاجاغینین ضمانتی اولماسا دا تورکیه گلهجکده موجود ساحه اوزرینده حاکمیتینی گوجلندیرهرک ادلیب بحرانینین یئنیدن قارشیسینی آلا بیلر. مسکوا ذیروه سینین ان واجیب نتیجهسی اودور کی، تورکیه-روسیا موناسیبتلرینین دیگر جهتلری داها اهمیتلی گؤرولهرک ادلیب سببیندن ریسکه آتیلمادی. آنجاق گونون سونوندا ایکی طرفلی موناسیبتلر ادلیب بحرانین دان یارا آلاراق چیخدی.