جوزپ بورل؛ فیلیسطین دؤولتینین تانینماسی تشبوثلری

اوروپا بیرلیگینین خاریجی علاقه‌لر و تهلوکه‌سیزلیک سیاستی اوزره عالی نوماینده‌سی جوزپ بورل بعضی اوروپا بیرلیگی اؤلکه‌لرینین می آییندا فیلیسطینی رسما تانیماسینی گؤزلَییر.

ایسپانیانین رسمی خبر آژانسی، ای‌اف‌ای دیپلوماتیک منبعلره اساسلاناراق سعودی عربیستانین پایتخاتی ریاض‌دا کئچیریلن دونیا ایقتصادی فورومونا قاتیلان بورلین بیر گروپ ژورنالیستله گؤروشه‌رک فیلیسطین دؤولتینین تانینماسی تشبوثلری ایله باغلی قیمتلندیرملر آپاردیغینی بیلدیریب.

دیپلوماتیک منبعلر بیلدیریبلر کی، بورل گؤروش زامانی "ایکی دؤولتلی حل عینی زاماندا فیلیسطینین تانینماسی مسئله‌سینی‌ ده حل ائتمه‌لیدیر، چونکی دؤولت اولمایان بیر اؤلکه اوچون ایکی دؤولتلی حل یولو اولا بیلمز" دئدی.

وئریلن معلوماتدا، "بعضی اوروپا بیرلیگی اؤلکه‌لرینین مؤوجود شرطلری نظره آلاراق فیلیسطینی موثبت شکیلده تانیماق ایمکانینی گؤردوکلرینی آچیقلادیقلارینی" وورغولایان بورلین، بعضی اوروپا بیرلیگی اؤلکه‌لرینین دقیق تاریخ بیلدیرمه‌سه‌لر ‌ده می آییندا فیلیسطین دؤولتینی تانییاجاغینا اومید ائتدیگینی سؤیله‌دی.

بورل بیلدیریب کی، "بو، اورتاق مؤوقع توتماق باخیمیندان اوروپا بیرلیگی سویه‌سینده موذاکیره ائدیلن بیر مسئله دئییل. میللی قرارلار وئریله‌جک".

ایسپانیانین اؤنجول اولدوغو و لابیچیلیگی ایله دستک وئردیگی فیلیسطین دؤولتینین تانینماسی تشبوثونه ایرلند، اسلوونی، مالتا و نوروژین دستک وئردیگی بیلینیر.