فیلیسطینین بیرلشمیش میللتلر تشکیلاتینا تام عضولوک مراجعتی

فیلیسطین بیرلشمیش میللتلر تشکیلاتینا تام عضو اولماق اوچون بیر داها مراجعت ائدیب.

فیلیسطینین بیرلشمیش میللتلر تشکیلاتیندا‌کی دائیمی مشاهده‌چیسی ریاض منصور فیلیسطینین بیرلشمیش میللتلر تشکیلاتینا تام‌حوقوقلو عضولویو‌ ایله باغلی یئنی مکتوب گؤندریب.

مکتوبو‌نون صورتی‌نین‌ ده یئر آلدیغی سوسیال مئدیا پلاتفورمو ایکس‌ده پایلاشیلان فیلیسطین دؤولتی‌نین یازی‌سیندا، "بو گون فیلیسطین دؤولتی فیلیسطین رهبر‌لیگی‌نین بویروغو ا‌یله باش کاتیبه‌ (آنتونیو گوترش) عضولوک موراجیعتینه یئنیدن باخیلما‌سینی خواهش ائدن مکتوب گؤندریب" دئییلدی.

منصورون گوترشه خطاب اولاراق یازیلان مکتوبوندا "23 سپتامبر 2011-جی ایل تاریخلی S/2011/592 سندینده یئر آلان فیلیسطین دؤولتی‌نین بیرلشمیش میللتلر تشکیلاتینا عضولوک موراجیعتی ا‌یله باغلی و فیلیسطین رهبر‌لیگی‌نین بویوروقلاری‌ ایله بو عریضه‌نین آوریل آییندا تهلوکه‌سیزلیک شوراسی طرفیندن یئنیدن قییمتلندیریلمه‌سینی طلب ائتمکدن فخر ائد‌یرم." بیاناتی داخیل ائدیلیب.

منصور مکتوبدا بو طلبین ان قیسا زاماندا بیرلشمیش میللتلر تشکیلاتی تهلوکه‌سیزلیک شوراسینا چاتدیریلما‌سینی ایسته‌ییب.

فیلیسطینین بیرلشمیش میللتلر تشکیلاتیندا‌کی دائیمی مشاهده‌چیسی منصور 26 سپتامبر 2022-جی ایل تاریخینده تهلوکه‌سیزلیک شوراسینا تام عضولوکله باغلی چیخیشیندا بیرلشمیش میللتلر تشکیلاتی تهلوکه‌سیزلیک شوراسی‌نین 23 دسامبر 2016-جی ایل تاریخده قبول ائتدیگی 2334 ساییلی قطعنامه‌ ایله فیلیسطینین اراضی بوتؤولویو‌نون بیرلشمیش میللتلر تشکیلاتی طرفیندن تانیندیغینی خاطیرلادیب و موافیق اولاراق تام حوقوقلو عضولوک استاتوسو‌نون تصدیق اولونما‌سینی ایسته‌ییب.

قراردا ایسرائیلین 1967-جی ایلدن بری ایشغال ائتدیگی فیلیسطین اراضیلرینده، او جومله‌دن دوغو قودسده یاشاییش منطقه‌‌لری یاراتماسینین غیری-قانونی اولدوغو تصدیقلنیب و ایسرائیلی ایشغال ائتدیگی فیلیسطین اراضیلرینده بوتون مسکونلاشما فعالیت‌لر‌ینی درحال دایاندیرماغا چاغیریب.

بیرلشمیش میللتلر تشکیلاتینین عضوو اولمایان فیلیسطین 193 عضولو تشکیلاتدا "عضو اولمایان مشاهده‌چی دؤولت“ استاتوسونا ما‌لیکدیر.

2012-جی ایلده بیرلشمیش میللتلر تشکیلاتی عمومی قورولو فیلیسطینین استاتو‌سونو "مشاهده‌چی تشکیلات"دان "عضو اولمایان مشاهده‌چی دولت"ه یوکسلدیب.

فیلیسطینین بیرلشمیش میللتلر تشکیلاتینا تام حوقوقلو عضو اولماسی اوچون بیرلشمیش میللتلر تشکیلاتی تهلوکه‌سیزلیک شوراسی‌نین تصدیقی طلب اولونور، داها سونرا بیرلشمیش میللتلر تشکیلاتی عمومی قورولوندا سس‌وئرمه کئچیریلیر.

فیلیسطین 2011-جی ایلده بیرلشمیش میللتلر تشکیلاتینا تام عضو اولماق اوچون مراجعت ائتمیش، لاکین بو مراجعت بیرلشمیش میللتلر تشکیلاتی تهلوکه‌سیزلیک شورا‌سیندا لازیمی دستیی آلمامیشدی.