ولادیمیر زلنسکی مسلمان عسگرلرین ایفطار پروگرامیندا ایشتیراک ائدیب

اوکراین جمهور باشقانی ولادیمیر زلنسکی پایتخت کی‌یفده اوردودا خیدمت ائدن مسلمان عسگرلر اوچون تشکیل ائدیلن ایفطار پروگرامیندا ایشتیراک ائدیب.

اوکراین باشقانلیق ایداره‌سیندن وئریلن معلوماتا گؤره، پروگرامدا اوکراینلی سیاستچیلرله یاناشی، قیریم تاتارلارینین میللی لیدری مصطفی عبدالجمیل قیریم‌اوغلو، تورکیه‌نین باش اومبودسمانی شرف مالکوچ، تورکیه‌، تورکمنیستان، فیلیسطین، اؤزبکیستان ، مصر، لیبی، پاکیستان، اندونزی، گونئی آفریقا جمهوریسی، آذربایجان، الجزایر، سودان، قطر، عراق و قیرغیزیستان دیپلوماتیک میسیونلارینین نماینده‌لری ایشتیراک ائدیبلر.

پروگرامدا مسلمان عسگرلره موکافاتلار تقدیم ائدن زلنسکی اؤتن ایلدن یئنی عنعنه‌یه باشلادیقلارینی بیلدیریب.

موبارک رمضان آیینی بو شکیلده بیرلیکده قید ائتدیکلرینی بیلدیرن زلنسکی، "دولتیمیزین سیاسی رهبرلیگی، حربی قوماندانلار، اوکراین موسلمان جماعتینین نماینده‌لری، قیریم تاتار میللی مجلیسی و دیپلوماتیک جامعه‌لرین هامیسی بیر یئرده‌دیر. بو گون بورادا عینی یرده بیرلیکده اولدوغوموز اوچون چوخ خوشبختم. بیرلیک هر زامان واجیبدیر. خصوصوسیله حیاتلار محاربه‌ و آمانسیز هوجوملارین کؤلگه‌سینده قالدیغی زامان بیرلیک واجیبدیر." دئدی.

زلنسکی اوکراین مدافعه‌ و تهلوکه‌سیزلیک گوجلرینده اؤلکه‌سینی و آزادلیقلارینی مدافعه‌ ائدن مسلمان عسگرلرین موباریزه‌سینی تقدیر ائدیب و گؤستردیکلری جسارته گؤره تشکور ائدیب.