روسیه پرزیدنت سئچکیلرینین قطعی نتیجه‌سی آچیقلانیب

روسیه مرکزی سئچکی کمیسیونو رهبری اللا پامفیلووا بیان ائدیب کی، ولادیمیر پوتین مارتین 17-20-ده کئچیریلن پرزیدنت سئچکیلرینده قطعی نتیجه‌لره گؤره 87.28 فائیز سسله غالیب گلیب.

پامفیلووا کئچیردیگی مطبوعات کونفرانسیندا پرزیدنت سئچکیلرینین قطعی نتیجه‌سینی آچیقلاییب.

اوزاقدان الکترونیک سس‌وئرمه‌یله سئچکیلرده اشتراک نیسبتینین یوزده 77.49 اولدوغونو و 87 میلیون 576 مین 75 نفرین سس وئردیگینی بیلدیرن پامفیلووا ”معاصر روسیه تاریخینده بئله‌ بیر گؤستریجی اولماییب“ دئدی.

حاضرکی پرزیدنت پوتینین 87.28 فائیز سسله سئچکیلرده غالیب گلدیگینی آچیقلایان اللا پامفیلووا 76 میلیون 277 مین 708 نفرین پوتینه سس وئردیگینی بیلدیریب.

پامفیلووا بیلدیریب کی، کومونیست پارتیسینین آدایی نیکولای خاریتونوو 4.31 فائیز و 3 میلیون 768 مین 470 سس، یئنی خالق پارتیسینین آدایی ولادیسلاو داوانکوو 3.85 فائیز و 3 میلیون 362 مین 484 سس، لیبئرال دئموکرات پارتیسیندن لئونید سلوتسکی ایسه 3.20 فائیز سسله 2 میلیون 797 مین 629 سس توپلادیغینی قید ائدیب.

یئنیدن سئچیلن پوتین داها 6 ایل وظیفه‌سینده قالاجاق. می آییندا حاضرکی صلاحیت مدتی باشا چاتدیقدان سونرا آند ایچجک پوتین 5-جی دفعه‌ روسیه پرزیدنتی وظیفه‌سینین ایجراسینا باشلایاجاق.

سئچکیلرین قطعی رسمی نتیجه‌لری آچیقلاندیقدان سونرا روسیه لیدری پوتین ویدئو کنفراسلا وطنداشلارا مراجعت ائدیب.

ولادیمیر پوتین هر بیر نامزدین پروبلملرین حلی‌یله باغلی یاپیجی تکلیفلریندن اؤلکه‌نین گلیشمه‌ آدینا بیرگه ایشده استفاده‌ ائدجکلرینی بیان ائدیب.

سس‌وئرمده اشتراک ائدن هر کسه تشکور ائدن پوتین خلقین اونا اولان اعتمادینی دوغرولتماق اوچون الیندن گلنی ائده‌جیینی بیلدیریب.