یمنده شیددتلی یاغیش و سئل

یمنین مرکزی بؤلگه‌لریندکی مارب شهرینده 6 مین کؤچکون عائیله‌نین شیددتلی یاغیش و داشقینلاردان ضرر چکدیگی آچیقلانیب.

یمن حؤکومتینین کؤچکون دوشرگه‌‌لری ایدارسینین درج ائتدیگی حساباتدا جمعه گونو ماربده یاغان گوجلو یاغیش و سئل نتیجه‌سینده ضرر گؤرن کؤچکون عائیله‌لر حاققیندا معلومات وئریلیب. حساباتدا 204 قاچقین دوشرگه‌سی و کؤچکون یمنلیلرین یاشادیغی بؤلگه‌لرده 6495 عائیله‌نین یاغیش و داشقینلاردان ضرر چکدیگی بیلدیریلیب.

قئید ائدیلیب کی، سئل نتیجه‌سینده یمنلیلرین بوتون اشیالاری، او جومله‌دن سیغیناجاق یئرلری، غذا و سیغیناجاق ملزمه‌لری زدلنیب.

حساباتدا سئلدن ضرر چکمیش عائیله‌لرین غذا، سیغیناجاق، گئییم و تمیزلیک ملزمه‌لرینه، دایانیقلی چادیرلارا احتییاجی اولدوغو بیلدیریلیب.

اینسانی یاردیم چاغیریشیندا اولان حساباتدا داشقیندان ضرر چکنلرین احتییاجلارینین قارشیلانماسی اوچون تعجیلی موداخیله‌یه احتییاج اولدوغو، کؤچکونلرین قالدیقلاری دوشرگه‌لرین سئل و یانغین کیمی فلاکتلردن قورونماسی اوچون عمومی استراتژینین معین ائدیلمه‌سینین واجیبلیگی وورغولانیب.

2014-جو ایلین سونوندان بری یمنده دیدرگین دوشموش 4.5 میلیون اینسانین 2 میلیوندان چوخو ماربده یاشاییر.

یمنده ایرانین دستکلدیگی حوثیلر 2014-جو ایلین سپتامبر آییندان پایتاخت صنعا و بزی بؤلگه‌لره نظارت ائدیر.

سعودی عربستانینین رهبرلیک ائتدیگی کوالیسیون گوجلری 2015-جی ایلین مارت آییندان حوثیلره قارشی یمن حؤکومتینه دستک وئریر.

اؤلکه‌ده ایللردیر داوام ائدن قارشیدورمالاردا 377 مینه یاخین اینسان حیاتینی ایتیریب. ان کاسیب اؤلکه‌لردن بیری اولان یمنده وتنداش موحاریبه‌سی سببی ایله اینسانی بحران گونو-گوندن بؤیویور.

بیرلشمیش میللتلر تشکیلاتینین قاچقینلار اوزره عالی کومیسرلیغینین حساباتلارینا گؤره، یمن خالقینین 73 فاییزی (تخمینن 23.4 میلیون) وطنداش موحاریبه‌سی سببیندن اینسانی یاردیما محتاج اولوب، 4.3 میلیون اینسان ایسه دیدرگین دوشوب.