حوثیلر آمریکا گمیسینی هدف آلدی
حوثیلرین عسگری سؤزچوسو یحیی سریع، سالدیرییا دایر تلگرام و ایکس سوسیال مئدیا پلتفورموندان آچیقلاما یاییملادی
یمندهکی ایران دستکلی حوثیلر، قیزیل دنیزده آمریکا بیرلشمیش دؤولتلرینه عاید پینوکیو گمیسینی دنیز موشکلری ایله هدف آلدیغینی بیلدیردی.
حوثیلرین عسگری سؤزچوسو یحیی سریع، سالدیرییا دایر تلگرام و ایکس سوسیال مئدیا پلتفورموندان آچیقلاما یاییملادی. حوثی دنیز گۆجلرینین آمریکایا عاید پینوکیو گمیسینه موشکلرله سالدیری گئرچکلشدیردیگینی ایفاده ائدن سریع، گمینین بیر باشا اصابت آلدیغینی ایفاده ائتدی.
حوثیلره عاید گوجلرین رمضان آییندا عسگری عملیاتلارینی آرتیراجاغینی و "مظلوم فیلیسطین خالقینا دستک و کؤمک ائتمه قونوسوندا دینی، اخلاقی و اینسانی وظیفهلرینی یئرینه یئتیرمهیه داوام ائدجگینی" بیلدیرن سریع، ایسرائیلین غزه یولاغینا قارشی سالدیریلاری دورانا و فیلیسطین خالقینا تطبیق اولونان قوشاتما قالدیریلانا قدر قیزیل دنیز و عمان دنیزیندهکی سالدیریلارین سۆرجگینی قید ائتدی.
حوثیلره عاید المسیره تلویزیون کانالینین تلگرام باتیسیندا حدیده شهرینه ۱۳ هاوا سالدیریسی تشکیل ائتدیگی بیلدیریلدی.
آمریکا مرکز قوتلر باشچیلیغی (سنتکوم) دا، قیزیل دنیزده، حوثیلرین کنترلونداکی بؤلگهلره ۶ "ساوونما سالدیریسی" ائتدیکلرینی بیلدیردی.
سالدیریدا بیر اینسانسیز دنیزآلتی و ۱۸ گمیسووار موشکین هدف آلیندیغی بیلدیریلهن آچیقلامادا، سؤزو گئدن سلاحلارین بؤلگهدهکی تیجاری گمیلره و آمریکا دونانماسینا عاید گمیلر اوچون "یاخین تهدید" اولوشدوردوغونون تعیین ائدیلدیگی ایفاده ائدیلدی.
آچیقلامادا، سالدیریلارین "سیر و سفر سربستلیگینی قوروماق و آمریکا دونانماسی ایله تیجاری گمیلر اوچون اولوسلارآراسی سولاری داها گوونلی حالا گتیرمک" مقصدی ایله ائدیلدیگی ایفاده ائدیلدی.
آچیقلامادا حوثیلرین دنیز موشکلری ایله هدف آلدیغی ایفاده ائدیلهن پینوکیو گمیسینین آمریکایا دئییل، سنگاپورا عاید لیبریا بایراقلی تیجاری گمی اولدوغو و سالدیریدا گمینین اصابت و یا زیان آلمادیغی قید ائدیلدی.
ایران دستکلی حوثیلر، ایسرائیلین غزهدهکی سالدیریلارینا تپکی سببی ایله ۳۱ اکتبردا یمن آچیقلاریندا ایسرائیللی شیرکتلره باغلی اولدوغونو ایفاده ائتدیکلری تیجاری گمیلره ال قویماغا، بعضیلرینه ده اینسانسیز هاوا آراجلاری و موشکلرله سالدیریلار تشکیل ائتمهیه باشلامیشدی.