قبریسوس ایسراییله چاغیریش ائدیب
دونیا ساغلیق تشکیلاتینین مودیری تدروس ادهانوم قبریسوس ایسراییلی غزه-یه اینسانی یاردیم میسیون لارینین داواملی، تهلوکهسیز و لاییقلی شکیلده کئچمهسینه ایجازه وئرمهیه چاغیریب.
دونیا ساغلیق تشکیلاتینین مودیری تدروس ادهانوم قبریسوس ایسراییلی غزه-یه اینسانی یاردیم میسیون لارینین داواملی، تهلوکهسیز و لاییقلی شکیلده کئچمهسینه ایجازه وئرمهیه چاغیریب.
قبریسوس دونیا ساغلیق تشکیلاتی، بیرلشمیش میللتلر تشکیلاتی (بمت) و فیلیسطین قیزیل آی قروپلارینین غزه-نین گونئییندهکی خان یونوس بولگه سینده محاصیرهده اولان امل خستهخاناسینا چاتدیغینی و اوراداکی 24 مریضی باشقا خستهخانایا کؤچوردوگونو بیلدیریب.
"امل خستهخاناسی 22 ژانویه - 22 فوریه تاریخلری آراسیندا 40 هوجوما معروض قالیب، 25 نفرین اؤلومونه سبب اولوب و یارارسیز حالا سالینیب" دئین قبریسوس 31 خستهنین هله ده خستهخانادا اولدوغونو بیلدیریب.
قبریسوس فیلیسطین قیزیل آی ایشچیلرینین وظیفهلرینی تام کووردیناسیون تصدیقی و تهلوکهسیزلیک تضمین لری ایله یئرینه یئتیرمهلرینه باخمایاراق، امل خستهخاناسیندان آیریلارکن پیس رفتارا معروض قالدیغی و تحقیر ائدیلدیگینی ایفاده ائدیب.
اوچ ساغلیق ایشچیسینین ساخلانیلدیغینی بیلدیرن قبریسوس "ساغلیق ایشچیلریندن بیری سربست بوراخیلدی. دیگر ایکی نفرین و دیگر ساخلانیلان ساغلیق ایشچیلرینین درحال آزادلیغا بوراخیلماسینی طلب ائدیریک" دئییب.
بو جور حاللارین تکرارلانماسینین حیات قورتاران یاردیمین چاتدیریلماسینی داها دا گئجیکدیردیگینی و قارشیسینی آلدیغینی قئید ائدن قبریسوس "ایسراییلی اینسانی یاردیم میسیون لاری اوچون (غزه-یه) داواملی، تهلوکهسیز و لیاقتلی کئچیده ایجازه وئرمهیه چاغیریریق. آتشکسه چاغیریریق" دئییب.