زلنسکی اوکراین اوردوسونون ایتکیلرینی آچیقلاییب

اوکراین پرزیدنتی ولادیمیر زلنسکی اوکراین اوردوسونون روسیه ایله ساواش بویونجا 31 مین عسگر ایتیردیگینی آچیقلاییب.

زلنسکی اوکراینین پایتاختی کی‌یئف‌ده کئچیریلن "اوکراین. ایل 2024" فوروموندا کئچیریلن مطبوعات کنفرانسیندا دانیشماسیندا "بو ساواشدا 31 مین اوکراین عسگری حیاتینی ایتیردی. بو رقم پوتین و اونون یالانچی چئوره‌سینین دئدیگی کیمی 300 مین و یا 150 مین دئییل. آما هر بیر ایتکی بیزیم اوچون بؤیوک ایتکیدیر. روس طرفینده 180 مین اینسان هلاک اولدو» دئدی.

اوکراین پرزیدنتی «دوشمنلرینه اوستونلوک وئرممک اوچون» یارالی و یا خبرسیز اوکراینلی عسگرلر باره‌ده معلومات وئریلمیه‌جیینی بیان ائدیب. زلنسکی ایلحاق ائدیلمیش اوکراین اراضیسینده حیاتینی ایتیرنلرین یاخینلارینا باش‌ساغلیغی وئره‌رک، غلبه‌نین ان قیسا زاماندا الده ائدیلمه‌سی اوچون اوکراین سیلاهلی قووه‌لرینین استراتژیسینین گیزلی ساخلانیلاجاغینی بیلدیریب.

اوکراین لیدری اوکراینین عکس-سالدیری پلانلارینین هوجومدان اول مسکو طرفیندن بیلیندیگینی دئییب، «آچیغینی دئییم کی، بیزیم اؤتن ایلین پاییزینداکی عکس-سالدیری باشلامازدان اول کرملین ماساسیندا ایدی. تمام" افاده‌لرینی وئریب.