برزیل اوکراین و فیلیسطین موناقیشهلرینی حللی اوچون چاغیریر
برزیلنین خاریجی ایشلر ناظیری: بیز اوکراین و فیلیسطینده داوام ائدن موناقیشهلرین صلح یولو ایله حللینه اؤنجهلیک وئرملیییک
برزیلنین خاریجی ایشلر ناظیری ماورو وییرا اوکراین و فیلیسطینده داوام ائدن موناقیشلهرین «صلح یولو ایله» حللینه چاغیریب.
وییرا برزیلین ائو ساحیبلیگی ایله ریو دو ژانیرودا کئچیریلن گ20 خاریجی ایشلر ناظیرلری توپلانتیسینی باشلادیرکن، "بیز اوکراین و فیلیسطینده داوام ائدن موناقیشهلرین صلح یولو ایله حللینه اؤنجهلیک وئرملیییک. قوزئیدهکی اؤلکهلر گونئیدهکیلردن فرقلی اولاراق، ساواش ایتتیفاقیندا بیرلشیب" دئدی.
وییرا، اؤلکهسینین داوام ائدن موناقیشهلردن "سون درجه" راحاتسیز اولدوغونو ایفاده ائدهرک، "صلح و امکداشلیق اوچون شرایط یاراتمادان یوخسوللوق، برابرسیزلیک و چئورهنین قورونماسی کیمی چتینلیکلرله نئجه موباریزه آپارا بیلریک؟" دئدی.
برزیل اولاراق اولوسلارآراسی گرگینلیگین آزالدیلماسی اوچون اوزرلرینه دوشنی ائتمهیه حاضیر اولدوقلارینی بیلدیرن وییرا، گ20-نین بو مؤوضوعدا «واجیب رولو» اولدوغونو بیلدیریب.
وییرا قئید ائدیب کی، چوخطرفلی تشکیلاتلار جاری چاغیریشلارلا اوزلشمهیه «کیفایت قدر» حاضیر دئییل و بیرلشمیش میللتلر تشکیلاتینین تهلوکهسیزلیک شوراسی روسیهدهکی موناقیشهلرین حللینده ثمرسیز قالیبدیر.
وییرا گ20-نین اهمییتینی وورغولادیقدان سونرا، "داوام ائدن مسئلهلری نظره آلساق، گ20 اؤلکهلری بیر-بیرینه ضد فیکیرلره مالیک اولسالار بئله، بیر ماسا اطرافیندا اوتوروب دانیشا بیلرلر. بو سببدن گ20 دونیانین ان مهم فوروملاریندان بیریدیر" قییمتلندیرمهسینی ائتدی.