ایتالیادا هاوا کیرلیلیگی
ایتالیادا هاوانین کیرلنمهسی یوکسک حده چاتدیغی و بیر موددتدیر داوام ائتدیگی اوچون یئرلی حاکیمییت اورقانلاری تدبیر گؤرمیه باشلاییب
هفته سونوندان بری داوام ائدن یوکسک هاوا کیرلیلیگی سببیندن ایتالیانین قوزئییندهکی بعضی شهرلرده چئوره و اینسان ساغلاملیغینین قورونماسی اوچون بعضی تدبیرلرین گؤرولهجیی بیلدیریلیب.
ایتالیا مطبوعاتیندا یئر آلان خبرلرده اؤلکهنین صنایع و مالیه مرکزی اولان قوزئیدهکی میلان و چئوره شهرلرده هاوا کیرلیلیگی سویهسینین " PM10 کونسانتراسیون" پارامترینه گؤره 20 فوریه گونو، آردیجیل ۴-جو گون "مقبول سویهدن چوخ یوخاری" اولدوغو ایفاده ائدیلدی.
بؤلگهسل چئوره آژانسی آرپا قوزئیده میلان، مونزا، کومو، برگامو، برسیا، مانتووا، کرمونا، لودی و پاویا شهرلرینده هاوانین کیرلنمه درجهسینی PM10 پارامترینه گؤره کوپمتر اوچون 50 میکروگرام هدّینین اوستونده اولدوغونو بیلدیریب.
قئید ائدیلیب کی، بو سویه میلاندا 73 ایله 122 میکروگرام آراسیندا دییشیب، مونزادا 111، کومودا ایسه 78 حددینه یوکسلیب.
هاوانین کیرلنمهسی یوکسک حده چاتدیغی و بیر موددتدیر داوام ائتدیگی اوچون یئرلی حاکیمییت اورقانلاری تدبیر گؤرمیه باشلاییب.
میلان دا داخیل اولماقلا بو 9 ایالتده توستو سویهسینین آزالدیلماسی اوچون ایلک تدبیرلر آچیقلانیب. مووافیق اولاراق، اهالیسی 30 میندن چوخ اولان بلدیهلرده «یورو 0»، «یورو 1» وه « یورو 2-3-4» کاتئگوریالاریندا دیزل یاناجاغی ایله ایشلیین اوتوموبیللرین هفته سونلاری نقلییاتا گیریشی دایاندیریلاجاق، ایستیلیک سیستمی ائولرده و تیجارت مرکزلرینده 19 درجدن یوخاری قالخا بیلمیجک. آیریجا آچیق هاوادا اود یاندیرماق اولمایاجاق.
هاوا مونیتورینگی و هاوا تمیزلمه محصوللاری ایستحصال ائدن سوئیس شیرکتی میلان هاواسینین چینین چنگدو و بنگلادشین پایتاختی داکادان سونرا هاوا کیفییتی ان پیس اولان 3-جو شهر اولدوغونو آچیقلاییب.
میلان بلدیه باشقانی جوزپه سالا شیرکتین آچیقلادیغی معلوماتلارا اعتراض ائدرک، اونلارین گونجل اولمادیغینی بیلدیریب.
ایتالیا چئوره و طب درنیینین (سیما) وئردیگی آچیقلامادا، اؤلکهده هر ایل قئیده آلینان تخمینن 80 مین واختیندان اوّل اؤلومون هاوانین کیرلنمسی سببیندن باش وئردیگی و بونون اوروپادا ان یوکسک سویه اولدوغو بیلدیریلیب.