زلنسکی آوروپا بیرلیگینه تشککور ائدیب

اوکراینا پرزیدنتی ولودیمیر زلنسکی آوروپا بیرلیگی‌نین اؤلکه‌سینه 50 میلیارد یورو دستک وئرمه‌سی قراری‌نین اؤلکه‌سی و آوروپانین آیاقدا قالاجاغی‌نین آیدین ایشاره‌سی اولدوغونو بیلدیریب.

فوریه‌نین 1-ده بلژیک-ین پایتاختی بروکسل-ده کئچیریلن آوروپا بیرلیگی لیدرلر ذیروه‌سینه ویدئوکنفرانس واسیطه‌سیله قاتیلان  ولودیمیر زلنسکی اوکراینایا 50 میلیارد یورو دگرینده دستک قرارینا گؤره لیدرلره تشککور ائدیب و دئییب:

"بو، اوکراینا و آوروپانین آیاقدا قالاجاغینا آچیق ایشاره‌دیر. بو قرارین 27 عضو دؤولت طرفیندن یئکدیل‌لیکله قبول ائدیلمه‌سی ده چوخ واجیب‌دیر. بو، سیزین بیرلیگین و اوکراینایا دستکینیزین داها بیر باریز گؤستریجی‌سی‌دیر".

زلنسکی آوروپانین تام اعتبارلی‌لیغینی و قرارلاری‌نین افکتیو‌لیگینی نوماییش ائتدیرمه‌ین ضروری‌لیگینی وورغولاییب و "روسیانین اوکراینا جبهه‌سینده آوروپایا قارشی باشلاتدیغی تجاووزه روسیانین متفیقیندن، یعنی قوزئی کره-دن گلن توپچو مرمی‌لری و بالیستیک راکت‌لر قوشولوب. بون‌لار سیویل آلت یاپیمیزی محو ائدن ایرانین شاهد (اینسانسیز هاوا آراجلاری) ایله یاناشی، شهرلریمیزه ده ضربه‌لر ائندیریر. کشفیات روسیانین پیونگ یانگ-دان بیر میلیون توپ مرمیسی آلاجاغینی تصدیقلییر" دئییب.

آوروپانین اوکراینا اوچون بیر میلیون توپ مرمیسی تداروکو پلانینا دقت چکن زلنسکی لیدرلره قرارین حیاتا کئچیریلمه‌سی‌نین یوباندیغینی خاطیرلادیب.

ولودیمیر زلنسکی قئید ائدیب کی، آوروپا باریش فوندو چرچیوه‌سینده 4 ایل مدتینه بودجه‌سی 5 میلیارد یورو اولان اوکراینایا یاردیم فوندونون یارادیلماسیندا آوروپا بیرلیگی لیدرلرینین یئکدیل‌لیگه احتیاجی وار.

ژانویه‌ده سوئیس-ا سفری زامانی قلوبال باریش ایجلاسی‌نین کئچیریلمه‌سی ایله باغلی راضیلیغین الده ائدیلدیگینی خاطیرلا‌دان زلنسکی همچنین آوروپا بیرلیگی لیدرلرینی ایجلاسدا حاضیرلیقدا فعال ایشتیراک ائتمه‌یه چاغیریب.