بمت غزه ایله باغلی راپور پایلاشدی
بیرلشمیش میللتلر تشکیلاتی اوکتبرین 7-دن بری ایسراییلین بومباردمانلاری آلتیندا غزه-ده حیاتینی ایتیرنلرین 40 فایزینین اوشاق اولدوغونو بیلدیریب.
بیرلشمیش میللتلر تشکیلاتی اوکتبرین 7-دن بری ایسراییلین بومباردمانلاری آلتیندا غزه-ده حیاتینی ایتیرنلرین 40 فایزینین اوشاق اولدوغونو بیلدیریب.
بمت-نین فیلیسطین خصوصی گزارش گری فرانچسکا آلبانیز بیرلشمیش شتاتلارین نیویورک شهرینده بمت-نین باش قرارگاهیندا فیلیسطینلی اوشاقلارلا باغلی باش قرارگاهینا تقدیم ائتدیگی راپوردا یازیلیر: "ایسراییل قوهلرینین غزه-نی داواملی بومبالاماسی آرتیق 5700 نفرین اؤلومونه سبب اولوب کی، بو رقم ایسراییل-ین ایتکیلریندن 5 دفعه چوخدور. هلاک اولانلارین 40 فایزی اوشاقلاردیر. نه لر اولدوغونو آنلاییریق می؟ 15 مین نفر ده آغیر یارالیدیر.
ایسراییلین غزه خالقینا قارشی غضبدن قایناقلانان زوراکیلیغی قبول ائدیلمزدیر. بؤلگهدهکی بوتون فیلیسطینلیلری "حماس" و باشقالارینین ائتدیکلرینه گؤره جزالاندیرماق قانونسوزلوقدور.
منیم راپوروم ایسراییل موهاجیرلرینین موستملکه ایشغالی ائتدیگی فیلیسطین اراضیلریندهکی اوشاقلارا نسیللر بویو تأثیرینه، اونلارین تهلوکهسیزلیک و لیاقتله یاشاماق حقوق لاریندان نه لرین قالدیغینا یؤنلیب.
2008-جی ایلدن اوکتبرین 7-نه قدر ایسراییلین هوجوملاری نتیجهسینده 1534 فیلیسطینلی اوشاق حیاتینی ایتیریب، 32 مین 175 اوشاق یارالانیب. عینی دؤورده عکس هوجوملاردا یالنیز 25 ایسراییللی اوشاق اؤلوب، 524-و یارالانیب.
2000-جی ایلدن بری 13 مین فیلیسطینلی اوشاق ایسراییل قوهلری طرفیندن حبس ائدیلیب، سورغو-سوالا توتولوب و وحشیجهسینه دؤیولوب.
دیگر طرفدن، ایسراییل-ین بومبالادیغی محاصیره آلتینداکی غزه زولاغیندا اهالینین 70 فایزی کؤچکون دوشوب.
غزه حکومتینین مطبوعات کاتیبی سلمه معروفون وئردیگی معلوماتلاردا غزه زولاغیندا 1 میلیون 400 مین آدامین ائولرینی ترک ائدهرک سیغیناجاق مرکزلرینه کؤچدوکلرینی بیلدیریب: "ایسراییل-ین هوجوملاری نتیجهسینده دیدرگین دوشنلر بؤلگه اهالیسینین 70 فایزینی تشکیل ائدیر و بو اینسانلار آغیر اینسانی شرایطده یاشاییر. کؤچکونلر مکتبلر، کیلسهلر، خستهخانالار و ساغلاملیق مرکزلریندن عبارت 223 سیغیناجاق مرکزینه سپلنیب. بو سیغیناجاقلاردا فیلیسطینلیلران اساس احیتاج لاریندان بئله محروم قالیبلار".