نیجرده دئوریلمیش پرزیدنت وطنه خیانتده اتهام ائدیلیر

جولای‌ین 26-دا نیجرده حاکیمیتی اله کئچیرن حربی جونتا سئچیلمیش پرزیدنت محمد بازوما قارشی دؤولته خیانت اتهامی ایره‌لی سورمک نیتینده اولدوغونو آچیقلاییب.

وطنی ساوونما میللی شوراسی‌نین (CNSP) سؤزچوسو آمادو عبدالرحمن طرفیندن اوخونان بیلدیریشده بازومون "دؤولته خیانت" و "اؤلکه‌نین تهلوکه‌سیزلیگینی تهلوکه آلتینا آلماق" اتهام‌لاری ایله محاکیمه اولونماسی‌نین ایستندیگی قئید ائدیلیب.

"بیز دئوریلمیش پرزیدنتی و اونون البیرلرینی وطنه خیانت و دؤولت تهلوکه‌سیزلیگینه تهلوکه تؤرتمک اتهامی ایله محاکیمه ائتمه‌یه ایمکان وئرن ثبوت‌لار توپلادیق"، -دئیه بیلدیریشده قئید اولونوب.

بعضی باتی افریقا سیاستچی‌لری ایله علاقه‌لی لوبی‌لرین "کئچید حکومتی" ایله باغلی یالان خبرلر یایدیغی قئید ائدیله‌رک، بو وضعیتین شدتله پیسلندیگی وورغولانیب.

بیلدیریشده اولوسلار آراسی توپلومون بعضی عنصورلارینین "دئوریلمیش حکومت مامورلاری" ایله هم رای لیگیندن ناراضیلیغا ایشاره ائدیلیب.

نیجرده ​​پرزیدنت محمد بازوم جولای‌ین 26-دا پرزیدنت محافظه‌سی آلایی‌نین عنصورلاری طرفیندن ساخلانیلیب و همین آخشام حربچی‌لر اونون حاکمیتی اله کئچیردیگینی اعلان ائدیب‌لر.

پرزیدنت محافظه آلایی‌نین قوموتانی ژنرال عبدالرحمن (عمر) تیچیانی جولای‌ین 28-ده وطنی مدافعه میللی شوراسی جونتاسینا رهبرلیک ائتمه‌یه باشلاییب و کئچید حکومتی‌نین باشچی‌سی اولوب.

وطنی ساوونما میللی شوراسی‌ آوقوستون 9-دا علی مهمن لامین زینی باش ناظیر تعیین ائدیب و بیر گون سونرا عسگر و سیویل شخص‌لردن عبارت 21 نفرلیک کابینه‌نی اعلان ائدیب.