سودان‌داکی قارشیدورما‌لاردا 435 اوشاق اؤلوب

سودان اوردوسو ایله سلاحلی قروپلاشما‌لار آراسیندا گئدن دؤیوش‌لر نتیجه‌سینده آزی 435 اوشاق هلاک اولوب، 2000-دن چوخو ایسه یارالانیب.

بو باره‌ده توققوشما‌لارین 100-جو گونونده بیرلشمیش میللت‌لر تشکیلاتی‌نین اوشاق فوندونون (یونیسف) سایتیندا یئرلش‌دیریلن راپوردا بیلدیریلیب.

یونیسف وورغولاییب کی، "رئال رقم یقین، داها یوکسک‌دیر". فوندون معلوماتینا گؤره، 14 میلیونا یاخین آزیاش‌لی‌نین عاجیل اینسانی یاردیما احتیاجی وار.

بون‌دان علاوه، بمت-نین اوشاق فوندو سودان-دا اوشاق حقوق‌لاری‌نین کوبود شکیلده پوزولماسی ایله باغلی 2500 فاکت باره‌ده معلومات آلدیغینی بیلدیریب.

راپوردا قئید اولونوب کی، مکتب‌لر، خسته‌خانا‌لار، اوشاق‌لارلا باغلی اولان مهم آلت یاپی لار مادی زیانا معروض قالیب. "یاردیم گؤسترن ایشچی‌لر ده هوجوما معروض قالیب، یونیسفه مخصوص اولان تاسیس لر، نقلیات واسیطه‌لری و تجهیزات تالان اولونوب و یا محو ائدیلیب. بو جور هوجوم‌لار اوشاق‌لارا کؤمک ائتمک قابیلیتیمیزی سارسی‌دیر"، - دئیه وورغولانیب.