نیجرده جمهورباشقانی گیروو آلیندی
"جمهورباشقانلیغی گؤزتچی آلایی عنصورلاری عاغیللی اولمازسا، اوردو و میللی گؤزتچیلر سالدیرییا حاضر"
نیجر جمهورباشقانی محمد بازووم، چئوریلیشه گیریشدیگی ادعا ائدیلن گؤزتچی آلایینا باغلی عنصورلار طرفیندن گیروو آلیندی.
یئرلی مطبوعات‌دا چیخان خبرلرده، ایچ ایشلری باخانی حمادوو آداموو سوولی ایله بازوومون، جمهورباشقانلیغی گؤزتچی آلایینا باغلی عنصورلار طرفیندن جمهورباشقانلیغی سارایین‌دا گیروو آلیندیغی ایفاده ائدیلدی.
گون ایچینده جمهورباشقانلیغینین توییتر حسابین‌دان، بازووم و عائله‌سینین وضعیتینین یاخشی اولدوغو بیلگیسی پایلاشیلمیش، جمهورباشقانلیغی گؤزتچی آلایینا باغلی عنصورلارین جمهوریت قارشیدی گیریشیم باشلاتدیغی بیلدیریلمیشدی.
پایلاشیمدا، "جمهورباشقانلیغی گؤزتچی آلایی عنصورلاری عاغیللی اولمازسا، اوردو و میللی گؤزتچیلر سالدیرییا حاضر" ایفاده‌سی ایشله‌دیلمیشدی. آنجاق بو پایلاشیم قیسا مدت ایچینده سیلیندی.
گیریشیمین آرخاسین‌دا، تخمیناً ۱۰ ایلدیر جمهورباشقانی گؤزتچی آلایی باشچیسی اولاراق وظیفه یئرینه یئتیره‌ن ژنرال عمر تچیانینین اولدوغو ایفاده ائدیلیر.
بازوومون سون گونلرده، اؤنجه‌کی جمهورباشقانی محمدو ایسوفو دؤنمینده ده عینی وظیفه‌ده اولان تچیانینی وظیفه‌دن آلماق ایسته‌دیگی ادعا ائدیلیر.
