بمت: سودان-دا قارشیدورما‌لارا گؤره 2،8 میلیون اینسان اؤلکه‌نی ترک ائدیب

بیرلشمیش میللت‌لر تشکیلاتی (بمت) سودان-دا موناقیشه باشلایان‌دان بری 2،8 میلیون اینسانین ائولرینی ترک ائتمک مجبوریتینده قالدیغینی بیلدیریب.

بمت-نین اینسانی مسئله‌لر کووردیناسیون اوفیسی (OCHA) سوداندا موناقیشه‌نین باشلادیغی 15 آپرئل‌دن بری تامین  ائتدیک‌لری معلومات‌لاری پایلاشیب.

یاییلان یازیلی بیاناتدا سودان-دا سون 11 هفته‌ده 15 اینسانی یاردیم ایشچی‌سی‌نین حیاتینی ایتیردیگی بیلدیریلیب.

سودان-دا 2،8 میلیون اینسانین دیدرگین دوشدوگونه دقت چکیلن بیاناتدا 2،2 میلیون اینسانین مجبوری کؤچکون اولدوغو، 615 مین اینسانین ایسه قونشو اؤلکه‌لره کؤچ ائتدیگی بیلدیریلیب.

بیاناتدا بوتون چتین‌لیک‌لره باخمایا‌راق، 2،5 میلیون‌دان چوخ اینسانا حیات قورتاریجی یاردیمین چاتدیریلدیغی قئید اولونوب.

بون‌دان علاوه سودان‌داکی قارشیدورما‌لاردا جان ایتکی‌سی‌نین 1133 نفره یوکسلدیگی، 11 مین 796 نفرین یارالاندیغی بیلدیریلیب.

بمت همچنین اؤلکه‌ده داوام ائدن موناقیشه‌لرده مجبوری کؤچکون قادین و قیزلارا قارشی جینسی زوراکی‌لیغی پیسله‌ییب.

بمت-نین اینسانی مسئله‌لرین کوردیناسیون اوفیسی (OCHA)، بمت-نین اینسان حقوق‌لاری بوروسو، بمت-نین قاچقین‌لار اوزره آژانسی (UNHCR)، بمت-نین اوشاق فوندو (UNICEF)، بمت-نین اها‌لی فوندو (UNFPA)، بمت-نین قادین‌لاری و دونیا ساغلیق تشکیلاتی (WHO) محاربه تاکتیکاسی کیمی ایستیفاده ائدیلن جینسی زوراکیلیغا درحال سون قویماغا چاغیریب.

قئید ائدک کی، سودان اوردوسو کئچمیشده دستک وئردیگی، لاکین موستقیل و پارالل اوردو کیمی فعالیت گؤستردیگی اوچون تهدید اولا‌راق قبول ائتدیگی چئویک دستک قوه‌لری‌نین (HDK) 2 ایل عرضینده تام شکیلده اوردویا انتگراسیونونو ایستییردی.

چئویک دستک قوه‌لری‌نین سیویل حکومت‌دن سونرا تخمینن 10 ایلی احاته ائدن بیر مدتده بونو قبول ائده بیله‌جگینی بیان ائتمه‌سی ایله باشلایان سؤز موناقیشه‌سی و گرگین‌لیک 15 آوریل سحری پایتاخت خارطوم و موختلیف شهرلرده طرف‌لر آراسیندا سلاح‌لی قارشیدورمایا چئوریلدی.

اوردو قوموتانی ژنرال عبدالفتاح البرهان و چئویک دستک قوه‌لری‌نین قوموتانی محمد حمدان دقلو قربان بایرامی‌نین ایلک گونو اوچون آتشکس اعلان ائدیب‌لر.