فرانسادا سون دوروم

فرانسادا، الجزایر اصللی گنج بیر سوروجونون پلیس سلاحی ایله اؤلدورولمه‌سینین آردین‌دان باشلایان اعتراضلاردا، هفته سونو بیر نفرین کؤکسونه پلاستیک مرمی اصابت ائتمه‌سی نتیجه‌سینده اؤلدوگو ایفاده ائدیلدی.
یئرلی قزئت لا مارسیلایسنین خبرینه گؤره، مارسیده ۱ جولایی ۲ جولایا باغلایان گئجه اعتراضلار سیراسیندا ۲۷ یاشینداکی بیر شخص، دؤشونه پلاستیک مرمی اصابت ائتمه‌سی نتیجه‌سینده حیاتینی ایتیردی.
مارسی ساوچیلیغی، حادثه‌یه باغلی، "اؤلومجول بیر جیسیمین اصابت ائتمه‌سی ایله بیر نفرین حیاتینی ایتیرمه‌سی" سببی ایله عدلی سوروشدورما باشلاتدی.
ساوچیلیغین آچیقلاماسینا گؤره، سؤز قونوسو شخصه پلاستیک مرمینین هارادا اصابت ائتدیگی هله تام اولاراق معین اولونابیلمه‌دی. 
او گئجه بؤلگه‌ده ائیلملر و یاغمالاما حادثه‌لری یاشانسا دا اؤلن شخصین بونلارا قاتیلیب قاتیلمادیغی دا بللی دئییل.
اؤته یان‌دان جمهورباشقانی امانوئل مکرون، نائل م. آدلی سوروجونون پلیس مرمیسی ایله اؤلدورولمه‌سینه تپکی اولاراق باشلایان گؤستریلرین باش وئردیگی بؤلگه‌لرین بلدیه باشقانلارییلا الیزه ساراییندا بیر آرایا گلدی.
مکرون، بورادا وئردیگی آچیقلامادا، "سوسیال مئدیا شبکه‌لرینه قارشی  قاداغالارا متمرکز اولمالیییق. ایشلر جیغیریندان چیخدیغیندا، (سوسیال مئدیا شبکه‌لرینه) گیریشی تنظیم ائده‌بیله‌جک و یا کسه‌بیله‌جک مؤقعیت‌ده اولمالیییق" دئیه دانیشدی.
ایچ ایشلری باخانی جرالد دارمانین ده میللی مجلیس‌ده دانیشماسیندا، گؤستریلرده گؤزآلتینا آلینان ۴ مین نفردن یوزده ۱۰دان داها آزینین خاریجی اولدوغونو ایفاده ائتدی.
عدالت باخانی اریک دوپوند-مورت ایسه، ائیلملر چرچیوه‌سینده گؤزآلتینا آلینانلاردان ۳۵۰ نفرین توتوقلاندیغینی آچیقلادی.

فرانساداکی شدتلی اعتراضلار
فرانسا پلیسی ۲۷ ژوئنده نانتر‌ده، ایچینده ۳ نفر اولان بیر ماشینا آتیش ائتمیش، ۱۷ یاشین‌داکی سوروجو نائلی اؤلدورموشدو.
نائلین اؤلومونه تپکی وئره‌نلر، اؤلکه چرچیوه‌سینده فرقلی شهرلرده کوچه‌یه چیخاراق پلیسله چاتیشمیشدی.
گنجی اؤلدوره‌ن پلیس ایشدن آلینمیش و توتوقلو اولاراق یارغیلانماسینا قرار وئریلمیشدی.
آیریجا پاریس، مارسی، لیون داخیل بیر چوخ شهرده تشکیل ائدیله‌ن اعتراضلاردا تالان و یاغمالاما حادثه‌لری یاشانمیش، ۱۰ قدر شهرده ساعات ۲۱.۰۰دا‌ن اعتباراً کوچه‌یه چیخما قاداغاسی اعلان ائدیلمیشدی.