آوروپا بیرلیگی تورکیه-یه باش ساغلیغی وئریب

آوروپا بیرلیگی شوراسی‌نین صدری چارلز میشل قهرمان ماراش مرکزلی زلز‌له‌لرده حیاتینی ایتیرن‌لره گؤره تورکیه-یه باش ساغلیغی وئریب و زلز‌له قوربان‌لارینا کؤمک اوچون بوتون ایمکان‌لارینی سفربر ائتمه‌یه حاضیر اولدوق‌لارینی بیلدیریب.

میشل بلژیک پایتاختی بروکسل-ده کئچیریلن آوروپا بیرلیگی لیدرلر ذیروه‌سی‌نین یئکونوندا مطبوعات کنفرانسی‌نین باشلانغیجینی فوریه‌نین 6-دا تورکیه-ده باش وئرن زلز‌له‌لره حصر ائدیب.

میشل تورکیه و سوریه-ده زلز‌له‌لر نتیجه‌سینده حیاتینی ایتیرن‌لره باش ساغلیغی وئریب.

میشل "آوروپا بیرلیگی و عضو دؤولت‌لر اولا‌راق، زلز‌له‌دن ضرر چکن‌لره و آختاریش-قورتارما سعی‌لرینه دستک اولماق عزمینده اولدوغوموزو بیلدیرمک ایستردیم" دئییب.

میشل آوروپا بیرلیگی ایجلاسی زامانی بوتون آوروپا بیرلیگی اؤلکه‌لری‌نین لیدرلری‌نین ایمضالادیغی مکتوبدا جمهور باشقانی رجب طیب اردوغانا زلز‌له قوربان‌لارینا کؤمک اوچون بوتون ایمکان‌لارینی سفربر ائتمه‌یه حاضیر اولدوق‌لارینی وورغولادیق‌لارینی خاطیرلادیب.

میشل همچنین زلز‌له‌دن ضررچکن‌لره کؤمک مقصدیله بروکسل-ده باغیشچیلار کنفرانسی تشکیل ائده‌جک‌لرینی ده بیلدیریب.

قئید ائدک کی، آوروپا بیرلیگی اؤلکه‌لری‌نین لیدرلری بروکسل-ده‌کی ذیروه توپلانتی‌سینا زلز‌له‌لرده حیاتینی ایتیرن‌لر اوچون بیر دقیقه‌لیک سکوتلا باشلاییب. پرزیدنت اردوغانا عنوان‌لانان ایمضالادیق‌لاری مکتوبدا لیدرلر باش ساغلیغی وئریب، دایانیشما مئساژی چاتدیریب‌لار.