اینسان جسدینین گۆبره‌یه چئوریلمه‌سینه ایجازه وئریلدی
گۆبره‌لشدیرمه طرفدارلاری بیر چوخ شهرده قبیریستانلیق سورونونون اولدوغونو و بو اصولون دا بو پروبلئمین حلی اولاجاغینی ادعا ائدیرلر
آمریکانین نیویورک ایالتی، اینسان جسدلرینین گۆبره‌یه چئوریله‌بیلمه‌سینه ایجازه وئردی.
۲۰۱۹.جو ایلده واشینگتن بونا ایجازه وئره‌ن ایلک آمریکا ایالتی اولموشدو.
گۆبره‌له‌شدیرمه اویقولاماسی، جسدلرین بیر کانتیتر ایجینده اودون یونگاسی (یونتولان شئیدن چیخان کیچیک پارچالار)، یونجا و چمن ایله بیرلیکده تخمیناً بیر آی ساخلانماسییلا گئرچکلشیر.
جسدلری گۆبره‌یه چئویره‌ن شئی ایسه میکروبلارین فعالیتیدیر.
جسدلر گۆبره‌لشدیکدن سونرا هر هانسی بیر یولوخما اولماماسی اوچون قیزدیریلیر و اورتایا چیخان تورپاق، اؤلنلرین یاخینلارینا وئریلیر.
آمریکا مرکزلی رکومپوس شیرکتی، بو خیدمت تابوتلا باسدیریلما و یا یاندیریلمایا گؤره تخمیناً ۱ تون داها آز کربن آچیغا چیخارتدیغینی بیلدیریر.
گۆبره‌لشدیرمه طرفدارلاری بیر چوخ شهرده قبیریستانلیق سورونونون اولدوغونو و بو اصولون دا بو پروبلئمین حلی اولاجاغینی ادعا ائدیرلر.
دیگر طرف‌دن، بو تورپاغین اخلاقی پروبلئم یاراتدیغینی دوشونه‌نلر ده وار.
نیویورک‌داکی کاتولیک اسقفلارین بونا قارشی اولدوقلاری، اینسان جسدلرینه "ائودن چیخان آتیق" کیمی یاناشماغین دوزگون اولمادیغی بیلدیریلیر.
بو پروسه‌نین تخمیناً ۷ مین دلارا یاخین خرجینی باهالی اولاراق گؤره‌نلر ده وار.
رکومپوس شیرکتی ایسه ۲۰۲۱.جی ایلده اورتالاما دفن خرجینین ۷ مین ۸۴۸، یاندیریلما خرجنین ایسه ۶ مین ۹۷۱ اولدوغونو نظره آلینجا، بونون یوکسک بیر خیدمت اولمادیغینی دئییر.
گۆبره‌له‌شدیرمه‌یه آمریکادان باشقا ایجازه وئره‌ن تک اؤلکه سوئد‌دیر.
