مولداوی و اوکراینا-یا "نامیزد اؤلکه" ایستاتوسو وئریلیب

آوروپا بیرلیگینه عضو اولان اؤلکه‌لرین لیدئرلری اوکراینا و مولداوی-یه "نامیزد اؤلکه" ایستاتوسونون وئریلمه‌سی باره‌ده قرار قبول ائدیب‌لر.

قرار آوروپا بیرلیگی لیدئرلری‌نین بلژیک-ین پایتاختی بروکسل-ده کئچیریلن ایجلاسی داوام ائدرکن آچیقلانیب.

آوروپا شوراسی‌نین صدری شارل میشل سوسیال مئدیادا اوکراینا و رومانیا دیل‌لرینده وئردیگی آچیقلامادا قراری "تاریخی" آدلاندیریب.

"بوگونکو قرار آوروپا بیرلیگی یولوندا چوخ مهم آدیم‌دیر" دئیه بیلدیرن میشل اوکراینا و مولداوی خالق‌لارینی تبریک ائدیب.

آوروپا بیرلیگی کمیسیونونون صدری اورسولا فن در لاین اوکراینا پرزیدنتی ولادیمیر زلنسکی و مولداوی پرزیدنتی مایا ساندویو تبریک ائدیب.

او، "اؤلکه‌لرینیز آوروپا عائله‌سی‌نین بیر حیسه‌سی‌دیر. لیدئرلرین بوگونکو تاریخی قرارلاری بونون تصدیقی‌دیر" ایفاده‌سینی ایشله‌دیب.

خاطیرلاداق کی، اوکراینا آوروپا بیرلیگینه نامیزدلیک عریضه سینی روسیانین هوجومونون باشلاماسیندان 4 گون سونرا، فوریه‌نین 28-ده، مولداوی و گورجوستان ایسه مارسین 3-ده تقدیم ائدیب.

ژوئن‌ین 17-ده آوروپا بیرلیگی کمیسیونو اوکراینا و مولداوی-یه نامیزدلیک ایستاتوسونون وئریلمه‌سی ایله باغلی گوروشونو آچیقلاییب. گورجوستان اوچون کمیسیون آوروپا پرسپکتیوینی تقدیم ائتمه‌سی و معیارلارا جاواب وئرمه‌سی شرطی ایله اونون وضعیتی‌نین داها سونرا یئنی‌دن قیمتلندیریلمه‌سینی توصیه ائدیب.

اوکراینا پرزیدنتی زلنسکی "نامیزد اؤلکه" ایستاتوسونو "غلبه" کیمی قیمتلندیریب.

زلنسکی اؤلکه‌سی‌نین گله‌جگی‌نین آوروپا بیرلیگینده اولدوغونو بیان ائدیب:

"بو، اوکراینا ایله آوروپا بیرلیگی آراسیندا موناسیبت‌لرده بنزرسیز و تاریخی مقام‌دیر".

قئید ائدک کی، نامیزد ایستاتوسو بیر اؤلکه‌نین اوزون مدت داوام ائده‌جک آوروپا بیرلیگینه عضولوک پروسه سینده ایلک آدیم‌دیر. بیر اؤلکه‌یه نامیزد ایستاتوسو وئریلدیک‌دن سونرا شرط‌لر یئرینه یئتیریلدیگی تقدیرده عضولوک ایله باغلی دانیشیق‌لار سونراکی مرحله‌لرده باشلاییر. عضولوک دانیشیق‌لاری‌نین باشلاماسی ایللر چکه بیلر.