پوتینین قرارینا گؤستریلن رئاکسیالار
روسیا پرزیدنتی ولادیمیر پوتینین اوکراینان-ین دوغوسوندا یونه تیم لرینی تانیماسینا رئاکسیالار گئجیکمهییب.
روسیا پرزیدنتی ولادیمیر پوتینین اوکراینان-ین دوغوسوندا یونه تیم لرینی تانیماسینا رئاکسیالار گئجیکمهییب.
“روسیا اوکراینانی ایشغال ائتمک اوچون بهانه آختاریر” دئیه آچیقلاما وئرن ناتو-نون باش کاتیبی ینس استولتنبرگ بیرلیگین روسیانین قرارینی پیسلهدیگینی بیلدیریب.
روسیانین دا داخیل اولدوغو بمت تهلوکهسیزلیک شوراسینین 2015-جی ایلده اوکراینانین اگمنلیگینی، اراضی بوتؤولوگونو و موستقیللیگینی تصدیق ائتدیگینی خاطیرلادان استولتنبرگ دئییب:
"دونتسک و لوگانسک اوکراینانین بیر حیسهسیدیر. مسکوا بولوجولره مالیه و حربی دستک وئرمکله اوکراینانین دوغوسونداکی موناقیشنی قیزیشدیریر. روسیا دا نؤوبتی دفعه اوکراینانی ایشغال ائتمک اوچون بهانه یاراتماغا چالیشیر".
آوروپا بیرلیگی کمیسیونونون صدری اورسولا فن در لاین آوروپا بیرلیگی شوراسینین صدری چارلز میشل، آوروپا پارلامئنتینین صدری روبرتا متسولا و آوروپا بیرلیگی-نین خاریجی علاقهلر و تهلوکهسیزلیک سیاستی اوزره عالی نومایندهسی جوزف بورل عینی واختدا سوسیال مئدیا حسابلاریندا روسیانین قوندارما دونتسک و لوگانسک خالق جمهوریت لرینین تانینماسی بارهده قرارینا رئاکسیا گؤستریب.
بیرگه مئساژدا آشاغیداکی ایفادهلر یئر آلیب:
"اوکراینادا ایکی بولوجو بؤلگهنین تانینماسی اولوسلار آراسی حقوقون، اوکراینانین اراضی بوتؤولوگونون و مینسک راضیلاشمالارینین آچیق شکیلده پوزولماسیدیر. آوروپا بیرلیگی و طرفداشلاری اوکراینا ایله دایانیشما ایچینده بیرلیک و قرارلی شکیلده رئاکسیا وئرهجکلر".
امریکا پرزیدنتی جو بایدن روسیانین موستقیللیگینی تانیدیغی دونتسک و لوگانسک بؤلگهلری ایله تیجارتی قاداغان ائدن فرمان ایمضالاییب.
آغ ائو بایدنین اوکراینا پرزیدنتی ولادیمیر زلنسکی ایله رئاللاشدیردیغی تلفون دانیشیغی ایله باغلی دا یازیلی آچیقلاما وئریب.
بونا گؤره، روسیانین دونباس-داکی بولوجولرین قوندارما حاکمیتینی تانیماسی قرارینین و بوندان سونرا آتیلاجاق آددیملارین موذاکیره ائدیلدیگی توپلانتیدا بایدن پوتینین بو قرارینی سرت شکیلده قینادیقلارینی بیلدیریب.
گؤروش زامانی بایدن زلنسکییه روسیانین اوکراینایا قارشی ایشغال آددیمینا تحریم لرله “گوجلو” جاواب وئرمهسی بارهده معلومات وئریب و رسمی کیئوه تام دستکینی ایفاده ائدیب.
امریکانین خاریجی ایشلر ناظیری آنتونی بلینکن ده یازیلی آچیقلاما وئرهرک، روسیا پرزیدنتی پوتینین قوندارما "دونتسک و لوگانسک خالق جمهوریتلری"نی تانیماق قرارینی شدتله قینادیقلارینی آچیقلاییب.
امریکانین خاریجی ایشلر ناظیرلیگینین بیاناتیندا دئییلیر کی، بلینکن اوکراینالی همکاری دمیترو کولبا ایله تلفونلا دانیشیب و روسیانین اوکراینانین دوغوسونداکی قوندارما جمهوریت لرین موستقیللیگینی تانیماق قرارینا امریکانین سرعتلی رئاکسیاسینی چاتدیریب.
بلینکنین امریکانین اوکراینایا سارسیلماز دستکینی چاتدیردیغی بیلدیریلن آچیقلامادا ایکی ناظیرین روسیانین قرارینا قارشی آچیقلانان سرت تدبیرلری موذاکیره ائتدیگی و علاوه تدبیرلرین گؤرولمهسینی تصدیقلدیگی قئید ائدیلیب.
آچیقلامادا بلینکنین بو مسئلهلری حل ائتمک اوچون اوکراینانین خاریجی ایشلر ناظیری کولبانی بو گون واشینقتوندا گؤرمگی سبیرسیزلیکله گؤزلهدیگی بیلدیریلیر.
اینگیلترهنین باش ناظیری بوریس جونسون “پوتینین قراری اولوسلار آراسی حقوقون آچیق شکیلده پوزولماسیدیر” دئیهرک مسکوایا قارشی تحریم لر اعلان ائدهجکلرینی، آلمانیالی همکاری اولاف شولتس ایسه روسیانین بو آددیمینی پیسلهییب.
فرانسا بمت تهلوکهسیزلیک شوراسینی فوق العاده ایجلاسا چاغیریب.
فرانسا پرئزیدئنتی امانوئل ماکرون روسیا پرزیدنتی پوتینین وئردیگی قرارلا اولوسلار آراسی عهده لیکلرینی پوزدوغونو بیان ائدهرک، آوروپادان بو اؤلکهیه قارشی تحریم لرله باغلی قرار قبول ائتمهسینی طلب ائدیب.
ایتالیانین خاریجی ایشلر ناظیری لوئیجی دی مایو دا “روسیا حاکمیتینین قوندارما بولوجو "لوگانسک و دونتسک جمهوریت لری"نی تانیماق قراری مینسک راضیلاشمالارینی پوزدوغو اوچون قینانمالی و دیپلوماتیک حل آختاریشلارینا جدی مانع یاراتدیغی اوچون پیسلنمهلیدیر. ایتالیا اوکراینانین اولوسلار آراسی میقیاسدا تانینان سرحدلری داخیلینده تورپاق بوتؤولوگونو و اگمنلیگینی دستکلمهیه داوام ائدیر” ایفادهلریندن ایستیفاده ائتمیشدیر.
ژاپونیانین باش ناظیری فومیو کیشیدا دا پوتینین اوکراینانین دوغوسونداکی بولوجو حکومتلری رسمن تانیماق قرارینی قطعیت ایله پیسلهدیکلرینی بیلدیریب.
فومیو کیشیدا مطبوعات کنفرانسیندا قئید ائدیب کی، روسیانین قوندارما "دونتسک و لوگانسک جمهوریت لری"نی تانیماسی مینسک باریش سازیشینه و اولوسلار آراسی حقوقا ضیددیر.
فومیو کیشیدا “روسیانین آددیملاری اوکراینانین اراضی بوتؤولوگونو و اگمنلیگینی پوزور. ایشغال باش وئررسه، ژاپونیا وضعیتی دایم ایزلهیهجک و تحریم لره ده داخیل اولماقلا سرت جاواب وئرمک اوچون گ7 اؤلکهلری و اولوسلار آراسی توپلوم ایله سیخ امکداشلیق ائدهجک" دئییب.
ژاپونیانین خاریجی ایشلر ناظبری یوشیماسا هایاشی کئچیردیگی مطبوعات کنفرانسیندا روسیانین قوندارما "دونتسک و لوگانسک جمهوریت لری"نی تانیما قرارینی پیسلهدیگینی و بونون "اوکراینانین اگمنلیگینی و اولوسلار آراسی حقوقو پوزدوغونو" سؤیلهییب.
آوسترالیانین باش ناظیری اسکات موریسون دا پوتینه رئاکسیا وئریب:
"روسیا گئری آددیم آتمالیدیر. قئید-شرطسیز اؤز سرحدلری آرخاسینا چکیلمهلی و قونشولارینی تهدید ائتمگی دایاندیرمالیدیر".
آلمانیانین خاریجی ایشلر ناظیری آنالنا بربوک روسیانین قوندارما "دونتسک و لوگانسک خالق جمهوریت لری"نی تانیماق قراریندان گئری چکیلمهسینی ایستدیکده، قازاخیستانین خاریجی ایشلر ناظیری موختار تیلوبردی روسیانین بو قراری تانیماسیندان صحبت گئده بیلمهیهجگینی وورغولاییب.
گونئی کره پرزیدنتی مون جائه این ده میللی تهلوکهسیزلیک شوراسینین ایجلاسیندا اوکراینانین اگمنلیگینیه و اراضی بوتؤولوگونه حؤرمت ائدیلمهلی اولدوغونو بیان ائدهرک، اؤلکهسینین بحرانین باریش یولو ایله حلینه نایل اولماق سعیلرینده ایشتیراک ائدجگینی بیلدیریب.
گورجوستان، سلوواکیا، چکیا، هوللاندیا و ایرلاندیا دا روسیانین قرارینا رئاکسیا وئریب.
ایلگیلیلی خبرلر
یول قیراغیندا ۱۰ نفرین جسدی تاپیلدی
مکزیده آکاپولکو شهریندهکی املیانو زاپاتا محلهسینده، چوخ ساییدا جسد تاپیلدیغی بیلدیریلدی